JZP investigando caso di tata di baby di aña y evaluando si ta persigui’e penalmente

ORANJESTAD - E caso di e tata di e prome baby di aña di Aruba ta wordo investiga pa e departamento Jeugd en Zeden Politie actualmente, unda cu tin cu dicidi si ta bay persigui e tata en cuestion pa su actonan. Manera ta conoci, Aruba a conoce su prome baby di aña 2016, y a bin resulta cu e tata di e baby ta mayor di edad y e mama ta menor di edad (15 aña) ora cu e baby a nace, y pa ley si e no a cumpli 16 aña ainda e acto ta uno ilegal. Esaki ta nifica cu pa ley, e tata a comete algo ilegal y por wordo persigui pa ley. 

INVESTIGACION HACI PA JZP

Despues di algun luna di no a tende nada, a resulta awor cu JZP awor tin e caso den su man, pa cual mester sali un procesverbaal di e investigacion aki. “Una bes cu fiscal haya e PV aki, e ta dicidi si ta persigui e tata penalmente” vocero di ministerio publico Ann Angela a confirma na NoticiaCla.com awe mainta. Mientrastanto NoticiaCla.com a compronde cu e desicion normalmente ta resulta den un persecusion penal. “E ora ta na hues pa dicidi (si ta castiga e tata of no)”, Angela a finalisa bisando. Ta bon pa bisa tambe cu normalmente e tipo di casonan aki ta wordo persigui.