Sentencianan afectando gobierno su maneho di tereno

ORANJESTAD - Tumando nota di e dos ultimo sentencianan den Corte riba e asunto di tereno (caso Ocean Z y Saliña Serca), gobierno ta evaluando con tin cu bay anda cu su futuro maneho riba e tereno aki. “Gobierno mester scoge pa termina of continuacion di e ‘politica di tolerancia’ (gedogen beleid) pa loke ta e actividadnan comercial den e areanan menciona”. Asina abogado cu a defende interes pa gobierno den e caso cu Zissu Properties NV a entama contra gobierno, Hans Sjiem Fat a splica hues den su defensa. 

KICO TA BIRA E PRIORIDAD DI GOBIERNO

Loke esey ta nifica segun e abogado, ta cu tin cu dicidi si gobierno ta duna prioridad na proteccion den e forma mas amplio posibel di ‘placer di biba’. of si e ta regula e ‘tendencia mundial’ di huurmento di acomodacion alternativa na turistanan door di individuonan di un miho forma. “Asina ta crea un balance entre e proteccion di e placer di biba y desaroyo turistico, unda cu ta promove pa ‘e individuo tambe por gana un cachi cachi di turismo’. 

INUNDA CU PETICION

E abogado a relata na Corte, e fenomeno di ultimo tempo unda cu pais Aruba a wordo ‘inunda’ cu e desaroyo unda cu mas y mas turista ta bin keda na Aruba den  ‘acomodacionan alternativa’ manera e conocido ‘guest houses’ y ‘bed & breakfast’, cu ta wordo exploita pa individuonan den e cercania di e coridor turistico. 

INVESTIGACION DI AHATA RIBA BNB

Segun investigacion di AHATA, ta trata di practicamente un tercera parti di e turistanan cu ta bishita Aruba. “E desaroyo aki ta wordo haci posibel parcialmente pa e internet y sitionan manera Air BNB” e abogado a sigui repasa. ‘Gobierno tin cu bay scoge si e kier contra aresta e desaroyo aki, of regul’e. Preveni esaki, lo mester sosode pa medio di mantenimento, y si kier regula esaki, mester conduci na adaptacion di e ROP (Ruimtelijk Ontwikkelings Plan). “Ora cu (gobierno) determina e maneho den futuro (cercano), Gobierno obviamente lo mester tene cuenta cu e decisionan cu hues(nan) y Corte lo dicta, referente e topiconan aki”, e abogado a finalisa bisando.