Waf di Aruba yen di bapor crucero cu 10.000 turista

ORANJESTAD - Un total di 6 bapor crucero tin cu percura pa por lo menos 9 oa 10 mil persona ‘extra’ den cayanan di Oranjestad awe. Un bista basta spectacular e bapornan aki ta laga na waf awe, unda cu for di mainta tempran te atardi, un total di 5 bapor lo ta staciona. E total di bapor cu ta yega, enberdad ta 6 pero uno ta bandona Aruba merdia caba (Coral Princess), mientras cu e otro ta yega merdia Monarch of the Seas). Cu e cantidad di bapor crucero mara na waf, ta bin tambe e congestionamento di trafico den henter e area, tanto pafo como paden. 

SCHEDULE OFICIAL

Segun e schedule crucero di Aruba Ports Authority NV, tin 5 bapor programa pa yega Aruba awe mainta. Coral Princess (di 6’or am pa 12:30pm), Azura (di 7’or am pa 5’or di atardi), Zenith (7’or di mainta pa 4’or di atardi) y Celebrity Eclipse (7’or di mainta pa 8’or di anochi). Monarch of the Seas ta e unico cu ta yega 1’or di merdia pa 6’or di atardi. Freewinds tambe ta yega 6’or di mainta pa 11’or di anochi. Pues por mira e orario cu ta pone cu na tur momento lo tin 5 bapor mara den waf awe. 

CANTIDAD DI PASAHERO 

Na tur, e cantidad di pasahero hunto segun capacidad pa turista crucero (lagando tripulante afor), ta suma total di 12.490 pasahero. Si tene na cuenta cu e bapornan por ta no ta completamente yen di turista mes, e ta bon pa por lo menos entre 9 pa 10 mil turista. Minister di turismo Otmar Oduber a pone riba su pagina di facebook cu tin por lo menos 10 mil turista. Pero NoticiaCla.com no por a confirma si e cifra ey ta corecto. Esey no ta kita afor cu e cifra ey ta hopi realistico mirando e capacidad di cada bapor crucero. Riba dje, tin e tripulantenan cu tambe (mayoria) ta baha na tera tambe pa haci nan diligencia y of shopping. Dependiendo di e grandura di e bapor, e ta varia entre 800 pa 1500 tripulante pa bapor. Pues aki tin un otro cantidad grandi extra cu por subi tera. No ta conoci si e mandatario a calcula turista plus tripulante den e cifra menciona di 10.000

Fotonan ta di pagina di facebook di minister Otmar Oduber.