Fiscal a pidi 4 aña di prison pa Robbie dos Santos den caso ‘Bientu’

WILLEMSTAD - Awe mainta fiscal den e caso di ‘Bientu’ unda cu ta tratando e fraude cu a tuma lugar den e mundo di wega di number, a presenta su demanda pa respectivo partido(nan) y tambe e persona(nan) envolvi. Di nan tur, e persona considera central den esaki, Robbie dos Santos, fiscal a pidi 4 aña di prison, di cual 1 ta condicional. Pa e cantidad di negoshinan di placa envolvi, a pidi sumanan miyonario como multa. 

DEMANDA 

Den e caso di ‘The Money Game Nv’, a pidi un multa di 3,5 miyon florin, ‘Jamarooma Lotteries’ multa di 1 miyon florin, ‘Administratiekantoor Dollar’, multa di 8 miyon florin. Pa Robbie dos Santos 4 aña prison di cual 1 aña  condicional, 2 aña proeftijd, verbeurd verklaring tur placa cash, verbeurd verklaring tur cuenta di banco y cuentanan di inversion.

E  DESAROYO DI E CASO

Hefe grandi di loteria Robbie dos Santos di Robbie's Lottery no ta comprende dicon net e ta wordo persigui den e caso Bientu pa benta di loteria ilegal. "Mi sa cu e manera di procede, mira for di punto di bista fiscal, ta incorecto, pero durante tur e añanan cu a trascuri no a pone mucho atencion na esaki. Nunca Gobierno di Corsou no a actua”, dos Santos a bisa dialuna den Corte. 

BUKI FALSO

Cu Dos Santos tawata uza bukinan di bon separa no ta ser desmenti durante e promer dia di e tratamento den corte di e caso Bientu. Cu riba e bukinan falso di loteria ta anota 'Wega di Number', e nomber di e loteria oficial, Dos Santos no ta haña straño. “Dicon no? ‘Wega’ ta significa ‘spel’. Tur hende cu ta cumpra un loteria riba caya sa cu ta trata di loteria falso." Dos Santos kier a dialoga cu servicio di impuesto riba e montante cu lo cobr'e retroactivamente, pasobra cu e no a paga impuesto di benta ni impuesto di ganashi riba e loteria bendi ilegal, pero e inspector a indica cu nan kier warda e resultado di e caso penal. Fuera di esey no a declara ni entrada ni bienes na servicio di impuesto, y Dos Santos ta declara di no sa e montante. "Mi no kier bisa cu evasion di impuesto ta bon, pero esaki lamentablemente ta mi destino den e mundo di loteria.”

Testigo

Den e caso Bientu cinco testigo a ser scucha pa hues Ter Berg, kennan tur a admiti cu e benta ilegal di loteria ta sosode full rond di Corsou y ta wordo practica pa diferente catochero. Entre nan ta figura e presidente anterior di Fundashon Wega di Number Kòrsou Marius Römer: “Tin mas loteria sin permiso cu tin loteria cu permiso. Pa es motibo Corsou ta perde di haña mas di 100 miyon florin na entrada riba base anual.” Huez ta dicta sentencia 1 di april proximo. 

Foto cortesia Paradise FM Curacao. Colaboracion Anneke Polak Caribisch Netwerk