Shamiro Anita den prome Concierto di aña titula “Danki” na Aruba

ORANJESTAD – Despues e hoben cantante Shamiro Anita a lansa su tremendo videoclip nobo titula “Esta Un Dushi Dia” di su album “Un Brasa So Mi Ke”, sigui pa su participacion den e concierto di Alabansa y Gradecimento cu a tuma luga diasabra  siman pasa na misa di Coromota, awor Shamiro lo ta den e grandioso concierto titula “Danki” na Aruba.

Ta trata aki di e prome concierto di canticanan Gospel cu lo tuma luga diaranson awor 9 mart 2016 pa 6.30 pm den Cas di Cultura na Aruba. Ekspektativanan pa e consierto aki ta grandi, konsiderando ku varios di e kantikanan di Shamiro riba su ultimo album “Kalma E Tormenta”, manera “Fiesta” ya ta hopi gusta na Aruba. Carchinan pa e  concierto ta bayendo manera pan cayente. Huntu cu e hoben Shamiro Anita di Corsou lo ta e artista principal, lo tin algun dje miho cantante y artistanan di Aruba manera Eltienne Yarzagaray & United Melodies, GIG y God’s Soldiers. 

Espectativa pa e Concierto aki ta asina grandi cu ta calcula cu e lo por Sold Out. P'esey ta importante pa esnan cu no kier perde e Concierto aki bay cumpra nan carchi mas lihe posibel pa garantia nan stul. Carchinan ta obtenibel na Gallo Rojo, Ritz Savaneta + Blvd, Cas di Cultura, Friends Of God Bookstore y Heaven HairStudio.

Manera ta conoci Shamiro a caba di cumpli 5 aña cantando canticanan cu mensahenan positivo y principalmente cu e palabra di Dios. Den e 5 añanan aki e lo logra saca 5 album di cual tur tabata hopi exitoso cu canticanan cu e alcansa e top di Musica Gospel. Ta traha aki di e albumnan Move Tur Montaña, Un Brasa So Mi Ke, Solo Un Abrazo, E Regalo Perfekto  y Calma E Tormenta.

Shamiro mes ta convenci cu ta su oracion na Dios ta loke ta yudand’e, habri portanan pa e por sigui logra su meta kual ta “Impacta tur hende ku skucha su musica cu mensahenan positivo y principalmente cu e palabra di Dios”. P’esey no tin duda cu durante di e concierto aki  Shamiro lo hasi un impakto grandi riba tur ku skuch’é kanta, kreando un ambiente yena cu Pas Bendicion cu su estilo unico y bunita di canta. Por spera un salanan yen yen riba e anochi aki den Cas di Cultura na Aruba.

Shamiro ta gradici Dios na prome luga pa ta sigui yud’e logra su metanan. E ta contento di por presenta na Aruba tambe, paso su Tata ta yiu di Corsou y su Mama ta Arubiana. Na Aruba tambe e tin hopi famia, amigo y conoci. Esaki ta un oportunidad Grandi pa nan tambe por yama Dios Danki hunto cu Shamiro den e concierto. Un danki di curason na tur esnan cu ta duna nan apoyo y cariño na Shamiro y cu ta sigui sostene su musica. E ta apresia esey masha hopi.