Mitar di 2016 proyecto restauracion California Lighthouse por ta cla

ORANJESTAD - E proyecto di restauracion di California Lighthouse en general por bisa cu ta canando bon y segun e planning. Manera ta conoci, e faro na Westpunt di mas di cien aña bieu ta pasando den un restauracion completo cu a inicia na luna di september di 2015. Durante e restauracion a desubri detayenan manera por ehempel cu e timpaannan cual ta e decoracion triangular cu por aprecia riba e bentananan di e faro di California tabata forma di un mezcla di santo, koraalsteen chikito y pidanan di panchi di dak.   

COLOR DI E FARO

E siman aki lo por cuminsa aprecia e color cu e faro lo tin di awor en adelante cual ta e color original. Despues di estudionan profundo realisa riba e Faro Monumentenbureau cual ta e expertonan den e area aki por a logra yega na e color original, cual ta un color ros kla, cu e Faro tabata tin den añanan trinta despues cu e a haña un capa di pleister mirando cu prome cu esaki e tabata completamente di piedra so. Ta spera cu pa mitar di aña e proyecto lo ta cla caminda cu e faro lo ta habri pa publico por subi atrobe y disfruta di e bista for di ariba.

STICHTING MONUMENTENFONDS ARUBA

E proyecto aki ta ser realisa pa Stichting Monumentenfonds Aruba logrando asina un di e metanan principal di e fundacion cual ta pa preserva nos pasado pa futuro generacionnan. E proyecto aki ta posibel danki na Nationaal Restauratie Fonds di Hulanda y tambe Aruba Bank. Despues cu na principio di aña 2015 a haci oficial cu e faro a bira propiedad di Stichting Monumentenfonds Aruba e trabounan a cuminsa inmediatamente pa asina por a yega na e destaho publico. ECOARUBA line Development NV a haña e proyecto y mesora bou di guia di Monumentenbureau como e lider di e proyecto y IMD Aruba como e architecto, a cuminsa cu e proyecto grandi di restaura un di e monumentonan mas bishita di Aruba cual ta nos California Lighthouse. Pa por haña mas informacion y detayenan di nos proyectonan por "like" nos pagina di facebook cual ta Stichting Monumentenfonds Aruba y tambe Monumentenbureau.