SETAR ta celebra na 30 aña Status Aparte y 30 aña SETAR!

ORANJESTAD - Den cuadro cu e celebracion di dia Nacional di Aruba dia 18 di maart 2016, den cual nos ta celebra 30 aña di Aruba su Status Aparte tambe ta alabes 30 aña di SETAR su existencia. SETAR a nace como prome compania Arubano di telecomunicacion.“Nos a mira un desaroyo grandi desde 1986 na Aruba den varios sector, primordialmente riba e tereno di telecomunicación. Asina por ehempel a bai over di sistemanan analoog pa digital y e serie di servicionnan cu ta algo automatico awendia manera internet, telefonnan celular etc. Cu na 1986 no por a pensa mes cu awendia lo por brinda e pueblo di Aruba e servicionan aki. Den e 30 añanan e desaroyo di telecomunicacion di Aruba a bai hopi acelera y cu varios innovasion pa Aruba.”, asina Maduro a subraya.

SETAR A SOSTENE ACTIVIDADNAN 18 MAART

Maduro a bisa cu durante tur e añanan desde Status Aparte SETAR semper a sostene actividadnan rond di 18 di maart full rond di Aruba. Den cuadro di esaki a anuncia asina participacion di SETAR como un di e sponsornan principal pa e festival “Un Canto pa Aruba” 2016 na unda muchanan, hobennan y hende grandi ta participa grandemente cu inspiracionnan local y típico. Hunto cu esaki, SETAR ta bai tin un categoría di premio pa esnan cu kier participa den e competencia pa poesia cu e tema: Creando Conexion: 30 aña Status Aparte y 30 aña di SETAR. E competencia di poesía traha pa SETAR ta habri pa grandi y chikito cu por expresa e cambionan aki y e aprecio pa Aruba su Status Aparte y cu yegada di SETAR como e pionero den telecomunicacion na Aruba 30 aña pasa.

COMPETENCIA DI PINTAMENTO

Sra. Shahaira Labad, hefe di Mercadeo di SETAR tambe a hiba palabra y a anuncia cu SETAR lo sponsor pa tur e premionan pa e Competencia Nacional Pintamento 2016, dedica na nos 30 aña Status Aparte y 40 Aña Himno y Bandera. SETAR lo otorga na e scolnan ganador un suma cash. Onderbouw (klas 1 te cu 3): Prome premio  Afl. 1.500, di dos premio Afl. 1.000 y di tres premio  Afl.750.  E mesun suma aki tambe pa e ganadornan bovenbouw (klas 4 te cu 6). SETAR lo tin premio pa e mucha tambe cu su pintura a sali ganador: Prome lugar un certificado na valor di Afl. 300,  di dos lugar un certificado na balor di Afl. 200, y na di tres lugar un certificado na balor di Afl. 100. Lo tin un premio special tambe pa e tema di Creando Conexion: 30 aña Status Aparte y SETAR.

TSHIRT EDICION LIMITA

“En conexion cu e celebracion di 30 aña SETAR nos tin na benta un T-shirt edicion limita.  E ta specialmente diseña pa e ocacion aki cu desde awe por cumpra na tur Teleshop. E lema cu ta aparece riba e t-shirt ta: “Rubiano Orguyoso” (un expresion popular) y SETAR creando conexion. Tambe den e diseño por wak sitionan importante di Aruba manera e vuurtoren, Kapel di Alto Vista, e fofoti, Waf, Fort Zoutman y e Anker na Colony. E t-shirt special aki ta costa Afl.15 y e ta obtenibel den dos color cu ta e cora y e color blauw berde.”, asina Shahaira Labad a splica. 

CAMPAÑA FACEBOOK

Labad a bisa tambe cu SETAR tin un campaña cu a caba di cuminsa riba Facebook caminda tur hende cu ta Fan di SETAR por conta nos kico ta pone sinti orguyoso di ta Rubiano. (Esaki por ta den potret, poesia, un simpel texto of un video). Por “post” esaki den nos FB page. Ademas Labad a informa cu lo bai tin ofertanan special dia di Himno y Bandera cu lo keda anuncia despues. Labad a termina deseando tur hende Felis dia di Himno y Bandera. “Ban gosa di e actividadnan cu tin rond. Saca bo bandera y mustra cu bo ta un Rubiano Orguyoso.”, asina ela expresa. Presente na e conferencia di prensa y cu tambe a hiba palabra tabata sra. Joase-Ann van der Biest di Museo Fort Zoutman cu ta encarga cu e competencia di Poesia Nacional y tambe sra. Julissa Boekhoudt c uta encarga pa guia y organisa e competencia nacional di pintamento.