Situacion financiero di Aruba no ta manera Hulanda ta pretende

ORANJESTAD - Segun un carta  di College Aruba Financieel Toezicht (CAFT) pa gobierno, e situacion financiero di Aruba ta mucho mas miho cu Hulanda ta pretende. Asina e periodista di e corant Antiliaans Dagblad, Rene Zwart ta raporta den e edicion di dialuna di  e matutino na Hulandes na Corsou. NoticiaCla.com a confronta minister di finanza di Aruba Angel Bermudez cu e informacion publica. “E cifranan ta corecto! ”, Bermudez a reacciona na NoticiaCla.com dialuna. “E interpretacion mester wordo miho splica si” e mandatario di finanza a sigui bisa. Di otro banda, CAFT ta mustra tambe sinembargo, cu gobierno ainda 'tin trabou pa haci'.

DEFICIT A YEGA 2%

Segun e carta interno (no publico) cu presidente di CAFT Age Bakker a manda pa e minister y su colega Eman y presidente di parlamento Marisol Lopez dia 4 di maart ultimo, e deficit pa 2015 enberdad a yega 2% cu ta casi mitar di e 3.7% cu CAFT a cumbini cu Aruba como maximum permiti y cu a wordo presupuesto como tal tambe. E raportahe di CAFT ta basa riba e di cuater rapport di ehecucion pa 2015, unda cu gobierno a procesa e cifranan di e ultimo cuartal di aña pasa. Esey ta splica e asombro di gobierno di Aruba dos siman pasa ora cu minister Hulandes Ronald Plasterk a mustra su precupacion den parlamento Hulandes pa cu e situacion financiero di Aruba. E preocupacion ey pues, no ta cuadra. 

GOBIERNO DI ARUBA A ACTUA CORECTO

E logro grandi, segun e relato di Zwart den AD, ta debi na e forma con gobierno a atende cu e situacion, manera e acuerdo cu SVB di e remision di e debe di 60.5 miyon y e introduccion di VAS (Voldoening op Aangifte Systeem). Algo cu Bermudez a confirma na NoticiaCla.com. “Introduccion di VAS enberdad a yuda cu esaki” Bermudez a bisa NoticiaCla.com. Ademas segun e mandatario, e entradanan presupuesta a wordo “ completamente realisa!”. E mandatario ta sigui mustra cu “ e gastonan a keda bou di loke a keda presupuesta, cu ta pone cu e deficit a bira mas chikito cu loke a wordo presupuesta inicialmente”. Esey ta pone cu e mandatario ta sigui positivo pa 2016 tambe. “E aña aki nos mester por bolbe logra un deficit di 2%”, Bermudez ta sigui bisa.  

CON GOBIERNO A LOGRA E SITUACION

Zwart ta cita e parti di e carta unda cu e ta confirma e punto di Bermudez riba e reduccion di gasto. “E gastonan a keda cu 1.351 miyon, 33 miyon bou di loke a presupuesta. Sigur danki na e reforma di AZV y AOV. “Sinembargo, segun Bakker, e desaroyo positivo na prome lugar no ta danki na un maneho expediente y escohencia conciente pa reduci e gastonan”, Zwart ta sigui bisa den su articulo. Segun  CAFT, retonan structural ta keda existi. CAFT ta haya cu e gastonan di personal ta keda halto. E hecho cu tin un deficit mas chikito na 2015, ta nifica tambe cu e quota di debe di Aruba ta mas den e direccion di e limite di 80%. Esaki a keda confirma tambe pa Bermudez. “Debi na e resultado di 2015, e quota di debe a yega bou di 80%”. Pa e aña aki ta premira un deficit ‘atrobe’ di 2%, Zwart ta sigui relata. 

EFECTO DI BENTA OF NO DI REFINERIA

Bek pa Bermudez, el a recorda NoticiaCla.com cu mester corda cu den e presupuesto 2016 no tin e scenario relaciona cu e situacion di refineria Valero. Esey kier men cu no a inclui e efecto di e refineria. Aki e mandatario a uza e dicho Hulandes ‘Sloop noch hoop’. “Otro luna nos sa cua efecto di esaki lo mester wordo adapta den e presupuesto” e mandatario a bisa. Esey ta cuadra cu e declaracion anterior di e mandatario, cu a mustra cu na mei awor lo reuni cu CAFT atrobe, pa analisa e prome cuartal di 2016, y pa e ora ey e asunto di refineria ta conoci definitivamente. “Si resulta cu mester tuma medida, lo considera esey e momento ey y lo adapta e presupuesto consecuentemente”. Por lesa e articulo completo di Antiliaans Dagblad aki.