Bataya legal pa otorgamento of no di un permiso di hotel

ORANJESTAD - Un biaha mas den sala di Corte awe, Zissu Properties NV y pais Aruba (gobierno) a topa otro pa medio di nan respectivo abogadonan. Zissu Properties ta buscando pa huez forsa minister di salud Alex Schwengle duna nan e permiso di hotel pa e hotel por cuminsa opera pa caba. “Minister no ta teniendo su mes na ley, ta actuando ilegal, y tin cu duna mi cliente su permiso di hotel”, abogado Winfred Kloes a argumenta pa su cliente Zissu Properties NV, mientras cu e doño Eva Zissu tabata wak den Corte. Abogado pa gobierno Hans Sjiem Fat a argumenta cu Zissu ta “abusa di e proceso legal y cu esaki ta nada mas cu un apelacion enmascara ”. E fundacion ‘Preserva Malmok’ a uni su mes na gobierno den e caso aki, representa pa abogado Brian Coffie, hunto cu ciudadanonan Harms, acesora pa abogado Dello Gomez. 

MINISTER ACTUANDO CONTRA LEY

E argumento principal di abogado di Zissu Properties ta cu su cliente ta e unico cu a tene su mes na tur regla y ley, y asina mes e no por opera su hotel. Tur esnan (propiedadnan cu tambe ta huur camber) otro no tin un acuerdo y nan cosnan no ta na ordo (segun e abogado), pero nan si por opera (nan hotel). Algo cu segun e abogado, no ta husto. Un otro problema cu e abogado ta mustra, ta cu e comparacion di propiedad ta inhusto. E hotel di su cliente tin ‘apenas’ 13 camber cu ta hospeda solamente 26 persona. Esaki mientras cu kier compara nan cu hotelnan cu ta hospeda porta 1000 persona pa propiedad. E atake principal tabata sinembargo riba e mandatario di salud Alex Schwengle, cu segun abogado di Zissu, ‘no ta tene su mes na ley y ta actua ilegal’. “E lo a firma e permiso, pero ora cu Zissu tabata pagando e placa pa e documento, a bin tende di e personal cu e minister a revoca e permiso debi na un sentencia den corte” Kloes a bisa. Esaki siendo cu e no tabatin motibo pa no duna e permiso. Den cuadro di esaki Kloes a uza tur posibel argumento, pa convence hues cu su cliente merece su permiso hotelero. 

AVISO Y CASONAN DEN CORTE

Segun Kloes, tur cos a cuminsa cu un aviso den prensa di su cliente, unda cu su cliente ta ofrece e propiedad pa, fuera di tin un hotel, ofrece fiesta pa dianan di fiesta. Algo cu a cay hopi malo den seno di e bisiñanan di e propiedad, y cu a conduci cu un caso sumario den corte. Ora cu a informa cu lo ‘para tur fiesta y no continua cu e plan ey, pero tene nan mes solamente na e plan hotelero, toch e bisiñanan a continua cu e caso. “Si no tabata pa e aviso porta, nunca lo nos tabata para akinan awo” Kloes a sigui bisa. 

PERDE PLACA 

E inversion di Sizzu di 5 miyon dollar ta pega awor cu e hotel no por opera segun e abogado. A bay den detayes riba tur parti di e proyecto, punto pa punto for di e permiso di construccion, e permiso di molester y cualkier otro permiso cu a keda otorga. A splica hues riba e construccion, e midi, e situacion y a invita e hues te hasta pa bishita e propiedad pa e mes convence su mes di e magnitud y e luhoso cu e propiedad ta. “Mi conoce e area bon. Mi ta haci deporte eybanda. Mi no tin necesidad di mira e propiedad” e hues a bisa sinembargo. A purba mustra cu prueba di midimento, cuanto auto ta pasa ey dilanti, y cu un propiedad extra, sigur lo no ta un problema. 

TUR DOCUMENTO NA ORDO

E abogado a subraya for di comienso te final, cu contrario na e caso anterior (unda cu hues a prohibi e compania pa opera) na januari, tur documento pendiente, (cu excepcion di esun hotelero), ta na ordo, firma y entrega. 

ABOGADO SJIEM FAT

Abogado pa gobierno, Hans Sjiem Fat a cuminsa na mustra cu e ta den un posicion fastioso. Esaki pasobra su cliente ta dilanti di un situacion unda cu si e cumpli cu e peticion di e contra partido, si huez honra nan peticion, cu e lo ta violando e sentencia di e propio corte cu a sentencia nan na prome lugar. “Corte tin e chens awor di caba cu esaki y defini finalmente kico nos mester haci” e abogado a sigui bisa. A considera henter e defensa di su contra partido, como un simple ripitishon di e caso anterior, solamente den un diferente forma y porta mas ‘style’. 

ABUSANDO DI CORTE

Mirando cu tin un caso di apelacion caba programa pa dia 22 di maart proximo, Sjiem Fat ta considera cu e contra partido ta ‘abusando di e caso aki como un chens atrobe’. E ta ‘abusa di e derecho di proceso’ enbes di simplemente warda e caso di apelacion. Interesante ta cu na e ocasion aki, e abogado a dicidi di reacciona riba e comentario fuerte den e ultimo caso, unda cu a hala atencion serio di gobierno (lesa esaki den un otro articulo despues) riba e tema con ‘gobierno lo ta zaag na e pianan di derecho di estado’. 

MINISTER NO RESPONSABEL

Abogado Sjiem Fat a protesta e hecho cu ta demanda e minister di Salud siendo cu tin cu demanda pais Aruba y no e minister. “No por tene e minister responsabel, ni como minister ni personalmente” Sjiem Fat a bisa. 

CONCLUSION 

Como conclusion, Sjiem Fat a mustra cu Zissu tin cu atende e asunto dia 22 di maart awor y no awo. E ta compronde cu tur e loke a wordo presenta ta ‘hopi interesante’ pero tur esaki mester wordo trata y contesta durante e caso y ‘no via e porta patras’, manera cu Sizzu ta haciendo. 

HUES

Hues tabatin algun pregunta durante e caso, unda cu a puntra e abogado di gobierno, pakico e minister en cuestion ainda no a dicidi riba e hecho si e ta duna e permiso of no. De hecho, e hues a reclama e abogado di gobierno cu e minister di Salud ta warda pa firma algo, siendo cu ta trata algo riba cual ta minister di infrastructura mester dicidi. Pues e parti di cambia destinacion di tereno. Pero segun e hues, e parti di dicidi si ta duna un permiso di hotel, ta otro y cu e mandatario di Salud mester por tin un opinion. “Sr hues, mi tin comprondi cu e minister ainda no a tuma su desicion. De hecho, e ta warda e sentencia pa wak kico e tin cu haci. Compronde pa e minister cu tin un multa ta colga riba su cabes, di 25 mil florin pa dia te na un maximo di 10 miyon florin. E no kier risca cu e ta haye ta paga esaki. E ta warda wak kico hues ta dicidi” Sjiem Fat a sigui bisa.

ABOGADO PA ‘PRESERVA MALMOK’

Abogado pa e fundacion Preserva Malmok, Brian Coffie a hiba un defensa basta agresivo, bayendo den extremo, listrando documento pa documento y purbando di tur forma pa convence hues pakico no mester duna e permiso di hotel, y a uza un sin fin di argumento. Dado momento a cuminsa refuta tur informacion di e contra partido, for di e hecho cu ningun documento, ni permiso a wordo duna. A bay asina leu di acusa e doño di a paga un suma no corecto pa un permiso di construccion, cu ta haci e permiso de hecho invalido. Abogado Dello Gomez cu a representa famia Harms, a tene su defensa cortico, di apenas 10 minuut, pa asina e proceso continua sin cu tin cu drenta den ripiticion. 

REPLIEK Y DUPLIEK

Den e oportunidad pa contesta, ambos partido a basicamente refuta acusacion di otro, unda cu dado momento hues a bisa cu e tin suficiente informacion y cu e lo dicta sentencia dia 21 di maart proximo.