Minister Bermudez a kibra silencio riba bishita di secretario general van Zwol

ORANJESTAD – Secretario general hulandes Richard van Zwol a bin Aruba cu e meta pa wak con Aruba por drecha e relacion entre Hulanda y Aruba pa por sigui dilanti. Esey tabata e mensahe principal di van Zwol, segun minister di finanza Angel Bermudez durante un programa di television diadomingo anochi. Cu e declaracion aki, e mandatario ta kibra e silencio cu tabatin riba e bishita di e secretario general siman pasa. Segun Bermudez, van Zwol a keda Aruba menos cu 24 ora siman pasa (diaranson anochi pa diahuebs merdia) y ta un oportunidad e tabatin pa reuni cune.

Segun Bermudez, a trata e asunto di presupuesto y a purba wak con ta yega na un solucion pa e problematico cu ta aden aworaki. Y e mandatario di Aruba a bisa di a priminti e mandatario hulandes, cu e lo haci tur posibel pa logra esaki. Esaki ta e prome biaha cu cu un representante di gabinete Mike Eman II ta papia riba e bishita di van Zwol, cu te cu siman pasa tabata un misterio pa tur hende. Di otro banda, contrario na informacion cu Noticiacla tin, Bermudez no a relata nada di un comentario di van Zwol riba e presupuesto mes, y kico Hulanda ta pensa riba e situacion. Manera cu NoticiaCla a raporta, no tabatin ningun comunicado, portret of relato riba e bishita di e persona, -e ambtenaar mas halto di rango den gobierno hulandes-, for di momento cu e la yega Aruba siman pasa.

Siman pasa NoticiaCla tabata e unico cu a raporta riba e bishita aki, siendo cu no tabatin nada cu a keda bisa publicamente. Esaki pasobra tanto na Aruba como na Hulanda tabatin un silencio hermetico riba e situacion di presupuesto 2014 di pais Aruba. NoticiaCla a compronde di su contactonan fededigno na tanto Hulanda como Aruba, cu no ta papiando nada nada riba e topico aki por lo pronto. Tur esaki mientras cu secretario general hulandes pa asuntonan di relacionnan di Reino Hulandes Richard van Zwol a bishita Aruba pa menos cu 24 ora siman pasa y atende entre otro cu e asunto di presupuesto 2014 di Aruba. “No tin nada pa raporta aworaki” tabata e reaccion general cu NoticiaCla a ricibi for di Hulanda diabierna mainta. Tanto di Aruba su representacion di Hulanda, como oficina di minister Plasterk.

NoticiaCla a raporta siman pasa tambe cu for di su fuentenan fidedigno cu van Zwol no tin problema pa e presupuesto por wordo firma, pero e mester ta condiciona si. Kico e condicionnan aki ta, NoticiaCla no por a haya sa pa motibo di e silencio hermetico. “Nada no a cambia, e investigacion ta continuando su caminda” tabata e contesta cu NoticiaCla a haya for di Hulanda. E unico informacion cu gobierno a laga los (te cu diadomingo anochi cu Bermudez a papia), ta cu van Zwol lo ta na Aruba y cu e lo a bay papia cu gobernantenan local.Foto di van Zwol ta cortesia Caribisch Netwerk.