Schwengle: Evaluando pa para subsidio di SABA si ta necesario

ORANJESTAD - "Pa via di e intrankilidad cu ta reinando den e casnan di anciano resortando bou di SABA, tanto na nivel di trahadonan, di clientenan y nan famia, mi a dicidi di yama un reunion urgente cu e Hunta di Supervision di SABA, e director di SABA y e sindicato cu ta representa e trahadonan", asina Minister Alex Schwengle a splica despues di e reunion cu a tuma luga e siman cu a pasa na Bestuurskantoor.

FALTA DI TRANSPARENCIA

No solamente e sindicato ABV, sino Minister Schwengle tambe a yega di expresa na mas di un ocasion di ta sinti cu falta mas transparencia den maneho di e fundacion cu ta opera 4 cas di anciano. Por ehempel den pasado e director di SABA a ataca Minister di Salud publicamente pa cual a daña e relacion hopi. Gobierno ta sinti cu e fundacion ta pidi subsidio so y no ta responsabilisa nan mes pa e suma cuantioso di placa cu nan ta haya anualmente.

ESNAN CU TA MANEHA SABA

Stichting Algemene Bejaardenzorg Aruba (SABA) ta existi desde 22 di maart 1972. E fundacion ta conta cu un Hunta di Supervision consistiendo di Ronny Tchong como Presidente, Jacqueline Bastien-Sherman, Rik Timmer, Johan Segers, Dr. Maria Odijk y Marcel Meelis como miembro. Remo Kock ta e director di e fundacion, pero tambe ta forma parti di e Hunta di Supervision. 

STATUTONAN FULL CERA PA GOBIERNO

Mi ta haya cu si Gobierno ta e proveedor mas grandi di placa, aunke e ta un fundacion particular, nos ta papiando awor di mas cu 23 miyon florin, mi ta kere cu como Gobierno no ta nada straño pa bisa cu e statutonan di SABA ta bieu y full cera pa Gobierno. Mi no ta kere cu esey ta bon", segun Minister dr. Alex Schwengle a expresa.  "Mi ta haya cu SABA mester modernisa su statutonan y duna Gobierno un mede zeggenschap den e Hunta di Supervision ta solamente parti di e cambionan. Tin hopi mas cambio cu ta necesario",   Schwengle a insisti. E mandatario ta lamenta cu e Hunta di Supervision ta keda riba nan punto cu no mester modernisa e statutonan ni pa promove mas transparencia. Pa di tres biaha e Minister a bisa e Presidente di SABA, esta mr. Ronny Tchong, cu mester bin apertura den renegosacion di e statutonan, pa modernisa e concepto di SABA, den maneho prome. Ta consciente cu esey lo no cambia tur cos mesora, pasobra tin hopi trabou pa haci. E maneho di "ouderenzorg" na Aruba den e ultimo decadanan no tabata integra.

STOP SUBSIDIO

"Bij deze mi ta bisa tambe cu Gobiernonan tin hopi fout den e asunto aki. Nos tambe ta laga di desea. Nos no a traha nos leynan adecuado den ouderenzorg, nos no a percura pa un bon CAD pa por controla e cuentanan anual,pasobra esey ta nos deber", di acuerdo cu Minister dr. Alex Schwengle. Na final el a enfatisa cu si SABA ta nenga pa Gobierno drenta, anto ta stop e subsidio y crea un otro fundacion pa tuma over.