Propietarionan Ocean Z hotel ta topa gobierno den corte dialuna

ORANJESTAD - Dialuna merdia e propietarionan di e boutique hotel Ocean Z ta topa gobierno den corte pa bringa nan caso. E peticion di e compania ‘Zissu Properties NV’ ta pa bringa e desicion di huez di januari 2016, cu a prohibi gobierno di duna e permiso di hotel, pa e compania por cuminsa nan operacion. Nan kier pa gobierno duna nan e permiso aki, ya cu esey ta e ultimo permiso cu nan falta pa por cuminsa. Segun e propietario Eva Sizzu a splica NoticiaCla.com recientemente, no ta compronde pakico esey no a wordo duna. Partidonan ta topa otro den corte awe tardi pa 2’or. 

TUR PERMISO EXCEPTO ESUN DI HOTEL

Den combersacion cu Zissu, e ta mustra cu e tin tur permiso prome cu e sentencia, prome cu e caso sumario cu nan a haya nan mes confronta cu ne, y prome cu e sentencia di dia 13 di januari ultimo. “E sentencia ey ta extemporaneo”. Segun Zissu, ‘ e sentencia ta uno inoportuno, for di tempo’. Y como tal a dicidi cu ta bay corte pa haya loke nan ta sinti cu nan tin derecho riba dje. E intencion ta pa nan por haya rason den corte y asina haya e unico permiso cu falta, cu ta esun hotelero, pa e wordo otorga pa minister di salud Alex Schwengle.

CLARIDAD DEN UN SITUACION CONFUSO

E caso tin cu trece claridad den e motibo pakico gobierno no a continua cu e intencion di duna permiso hotelero na e compania. Algo cu e minister no a duna mas, despues di e ultimo sentencia. E mandatario a declara e tempo ey cu mirando cu tin un sentencia, esaki ta para tur cos y como tal no ta bay duna e permiso. Esey mientras cu tur otro permiso tabata otorga.

PROTESTA DI PRESERVA MALMOK

Tabata na december cu e grupo di habitante di Malmok, Preserva Malmok, a opta pa hiba gobierno corte pa para e dunamento di permiso pa e compania Zissu Properties por a opera e hotel na Malmok. Segun e grupo cu a entama e caso, e compania en cuestion a cambia e destinacion di e propiedad cu mester a bira un simpel reconstruccion di un cas, pero a opta pa na caminda cambia esaki den un propiedad hotelero. Algo cu e habitantenan tabata contra. E caso a bin dilanti, y e sentencia despues a para e proyecto indicando cu te cu proximo aviso, e hotel tin cu para tur operacion y no por continua cu e plan. Gobierno na su turno, no tabata autorisa pa duna mas permiso, manera esun hotelero y no por a cambia e destinacion di e tereno manera cu nan a haci.

ABOGADO KLOES

Abogado Winfried Kloes ta e abogado di Zissu Properties NV y lo purba cambia e proceso y logra cu toch su cliente por haya e permiso necesario, pa por opera e hotel cu ta ‘on hold’ pa varios luna caba. Gobierno lo uza bufete di abogado Sjiem Fat pa bringa e caso aki.