MEP a pidi reunion publico pa trata cuido di nos grandinan

ORANJESTAD – Lider di MEP Evelyn Wever-Croes  a duna di conoce cu nan ta hopi preocupa pa cu e negligencia cu ta continua na e casnan di cuido di nos grandinan SABA. Parlamentario Wever-Croes a referi na e problemanan cu escases di personal y promocionan pega, y e manifestacionnan di malcontento na e casnan di cuido. “Pa e motibo aki nos a pidi un reunion publico urgente pa trata e tema aki. Nos grandinan no por sigi bou di e maltrato aki, e no ta husto. Di mi conbersacionnan cu esnan cu ta traha na SABA mi tin entendi cu e trahadornan na SABA ta traha bou di hopi presion, cu falta personal, y cu Gobierno no ta duna e subsidio pa cubri e salarionan. Esaki ya caba ta afectando e nivel di calidad di servicio cu nan ta dunando awor. Pero no esey so, sino esey ta pone cu nan no por tuma mas cliente. Esaki ta hopi duro pasobra aparentemente tin 150 persona riba wachtlijst pa drenta un cas di cuido. Hasta SABA a duna di conoce cu lo mester cera porta y manda trahadornan cas, of tuma mas medida drastico cu ta afecta e cuido cu nan mester duna. 

DEFENSA DI E MINISTER 

Segun Wever,  Schwengle a duna un defensa sumamente swak. Awor dirpiente e no sa unda e placa ta bay y e no tin nada di bisa den cuido di nos grandinan. E minister ta lubida cu e ta esun finalmente responsabel pa cuido di nos grandinan na Aruba. Politicamente e ta carga e responsabilidad pa maltrato di nos grandinan y e mester realisa cu bira minister no ta pa haci bunita, sino pa realmente carga responsabilidad. Ademas no ta husto cu su pleito cu e directiva di SABA mester bay a costo di cuido di nos grandinan.