Croes: Negociacion cu CITGO ta continua den direccion positivo

ORANJESTAD - Negociacion cu Citgo ta continua den direccion positivo.  Asina e mandatario di labor Paul Croes a bisa na momento di su regreso for di Houston den fin di siman cu a pasa. Manera ta conoci, Croes hunto cu minister Mike de Meza  y un ekipo grandi di expertonan a bishita Houston pa asina sigui dialoga riba e acuerdo pa re-apertura di refineria. Segun e mandatario, e tabata un bishita sumamente positivo, caminda e ekipo tecnico, huridico, financiero y economico a haci un bon trabou na momento di sinta cu e team di Citgo y haci tur esfuerso necesario pa yega na e documento final pa asina firma esaki dia 31 di maart proximo. E dia aki lo ta uno sumamente grandi y importante mirando e impacto cu esaki lo tin pa nos pais. 

ASUNTO DI PERMISO

”Adicionalmente a atende durante e encuentro na Houston, tocante e proceso di permisonan unabes cu companianan kier trece hendenan di afo pa traha den cierto ramonan specialisa. E delegacion Arubiano a duna di conoce na e ehecutivonan petrolero cu aki lo tin un proceso specifico pa atende cu ne pa asina haci esaki posibel.  Mara na e topico aki, a duna un actualisacion riba loke ta e Citgo Desk na Aruba. Croes a indica cu ta existi un entusiasmo halto di personanan cu kier bin Aruba bek pa traha na nan pais den e refineria. "Na e momentonan aki ta tumando nombernan y nan curiculum pa, ora ta asina leu, por presenta esaki na e compania pa asina nan por evalua y tuma e personanan den servicio," e mandatario a duna di conoce.  Según Croes, awor no ta keda nada otro pa warda ansiosamente riba 31 di maart caminda oficialmente por anuncia e reapertura.