Dangui Oduber: Mike Eman di welga di hamber pa coredo di Nascar

ORANJESTAD – Prome Minister Mike Eman a bay di tene un welga di hamber, pa coredo di caredanan Nascar (careda profesional di auto: red ). Esey ta pensamento di parlamentario di MEP, Dangui Oduber den un reaccion diadomingo anochi. Oduber ta referi na e careda di auto cu Eman a participa den dje diasabra na Charlotte, na Merca (mira e foto y reportahe aki) . Diasabra ultimo premier Eman riba su pagina di facebook, a postula un serie di potret, unda cu ta mira cu e ta disfrutado di su vacacion, y ta coriendo auto di careda. Algo cu e ta un aficionado di dje.

Segun Oduber, si enberdad e presupuesto 2014 tawata un caso entre bida y morto manera promer minister kier a pone henter e pueblo aki kere, e ta puntra pakico awe henter e gabinete Mike Eman 2 ta keto y ningun di nan ta papia mas di e presupuesto 2014. “ “Pakico awe e mesun promer minister cu kier a sacrifica su bida pa e presupuesto ta coriendo Nascar na Merca.” Segun Oduber, e ta respeta y no tin nada contra cu promer minister ta di vacacion pero no por ta asina cu despues cu a instiga pueblo contra gobernador, bai den welga di hamber, tuma henter un pais haci pa un presupuesto awe ta di vacacion manera nada no ta pasando y mas tristo aun ta haci comosifuera e presupuesto ya caba a wordo firma.

Segun Oduber, promer minister a bisa despues cu e la yama un reunion na su cas di partido cu su sostenedornan a dune mandato pa bai Hulanda y bai United Nations pa por logra pa gobernador firma e presupuesto. “E pregunta ta, pakico promer minister ainda no a subi avion bai Hulanda? Pakico promer minister no a bai United Nations manera cu mes a bisa e lo bai haci?” Oduber ta finalisa bisando.