Exitoso celebracion di 30 aña di Status Aparte na Hulanda

HILVERSUM - Na Museo Hilversum a tuma lugar e apertura di e exposicion "Gezichten van Aruba" ariba diasabra 5 di maart door di Minister di Turismo Otmar Oduber. Esaki den presencia di Minister pa Asuntonan di Reino Ronald Plasterk, Minister Plenipotenciario Alfonso Boekhoudt y CEO di ATA Ronella Tjin Asjoe-Croes. Tambe presente tabata Minister Plenipotenciario di Curacao Marvelyne Wiels, burgemeester di Hilversum Pieter Broertjes, miembro di Eerste Kamer Ruard Ganzevoort, partnernan di ATA y di Gabinete di Aruba y representantenan di diferente organisacionnan social y cultural Arubiano. Presentacion di e programa tabata na encargo di e conocido actor y personalidad di television Hulandes, e Arubiano Curt Fortin. Tabata tin discurso di Minister Plenipotenciario Alfonso Boekhoudt, Minister pa Asuntonan di Reino Ronald Plasterk y Minister di Turismo Otmar Oduber. E hoben cantante Arubiano Jeon a canta su ultimo hit 'Dushi Bida'. E escritor Hulandes Tommy Wieringa a papia ariba su hubentud na Aruba y con e isla ainda ta den su curason.E exposicion "Gezichten van Aruba" ta brinda un serie di portret di Arubianonan y sitionan na Aruba portreta pa e fotografo Hulandes renombra Raymond Rutting. E exposicion ta na Museo Hilversum te cu 3 di april 2016.