IATA: Aruba Happy Flow ta modelo pa delinea standard internacional

QATAR - E organisacion internacional di aviacion IATA a puntra Aruba pa presidi nan grupo di trabou cu ta atende cu facilitacion di Pasaheronan y tambe pa forma parti di e Grupo di Maneho pa cu Facilitacion di Pasaheronan. E gruponan di trabou aki y e grupo di maneho, cu ta supervisa esaki for di ariba, ta trahando pa formula standardnan pa cu e facilitacion di pasaheronan na aeropuertonan rond mundo. Pa por traha y formula standard IATA a institui e grupo di trabou unda tin representacion di tur actornan importante: gobiernonan, aeropuertonan, agencianan di biahe y tambe tin representacion di esnan cu ta ofrece e aparatonan. 

EHEMPEL UNICO 

Considerando cu Aruba's Happy Flow ta un ehempel y modelo unico, a papia extensamente durante tanto e reunion di e grupo di trabou como e grupo di maneho na Qatar con un concepto manera Aruba Happy Flow lo por tambe funciona pa otro aeropuertonan. Maske cu tin y por introduci diferente variante di Aruba's Happy Flow, e parti unico y fuerte ta e aspecto cu solamente un biaha mester controla y fiha e identidad di e biahero.  Despues di esey e pasahero a base di aspectonan biometrico, den e caso aki reconocimento di su cara, ta ser identifica den tur e demas pasonan cu un pasahero mester haci na un aeropuerto promer cu e por realisa su biahe. Den terminologia di IATA ta yama e concepto aki un "single token of one identity'. Tur e participantenan na tanto e grupo di trabou como e grupo di maneho a manifesta cu un concepto y standard manera esun di Aruba Happy Flow, lo mester wordo delinea.

ANNET STEENBERGEN

Annet Steenbergen a representa Aruba na Qatar cerca IATA; "E ta un gran honor y un muestra di reconocimento cu Aruba a ser pidi pa tuma un posicion di liderazgo pa locual ta trata e desaroyo di e futuro den e industria di aviacion. Entre awor y 15 te 20 aña e cantidad di pasaheronan cu ta biaha lo duplifica di 3,5 miljard pa 7 miljard. Solamente si e proceso na aeropuertonan wordo optimalisa y alabes aumenta e aspectonan di siguridad, lo por logra acapara e crecemento aki, ya cu no por sigui traha aeropuertonan mas grandi y ta dor di haci e procesonan mas eficiente lo haci posibel cu por atende fluhonan mas grandi di pasaheronan mientras ta sigui uza e infrastructura existente. Aruba ta un "trendsetter" den brinda un solucion pa e reto aki."