Dowers: Mehora medidanan di prevencion na RIU Palace

ORANJESTAD -  "Danki Dios e situacion ta bou control y no tabatin casonan serio di heridonan den e candela na e hotel", asina minister di musticia m Arthur Dowers a duna di conoce na su salida for di RIU Palace diasabra merdia. E mandatario, encarga entre otro cu cuerpo policial y cuerpo di bombero, a bay na e sitio pa pone su mes na altura di e situacion cu a presenta.

CANDELA

Hecho ta cu diasabra mainta a start un candela den e laundry di e hotel, di cual e empleadonan mes a purba domina pero no a logra, pa cual Cuerpo di Bombero a duna un man. Ora cu a conecta coriente atrobe, a nota cu e candela a bolbe cuminsa, pa cual a kita coriente di henter e edificio. Esey riba su mes ta trece cu ne cu e hotel a sali completamente for di operacion y a rekeri pa evacua empleadonan y huespednan.

HUESPEDNAN A PERDE BUELO

E fastioso ta cu tur esaki riba un diasabra mainta ora cu mas o menos 300 huesped mester check out di e hotel pa bay aeropuerto y regresa nan pais. Ta pronostica cu mita di nan a perde nan vuelo diasabra mainta pa cual mester re aloca nan den otro hotel y mira con ta yega na acuerdo cu e aerolinea nan pa pone nan riba otro vuelonan.

ESPACIO PA MEHORA

Cu e realidad ey riba mesa a nota cu tin espacio pa hopi mehoracion den e procesonan interno cu e hotel mester tin pa maneha tipo di crisisnan asina. Gobierno mester a pone un cantidad di departamento y ambtenaarnan riba pia pa maneha un situacion den e hotel, cu de facto ta un asunto priva. "Nos lo reuni cu RIU Palace otro siman pa mira si boluntariamente nan lo kier haci cambio den nan procesonan of sino nos lo cambia leynan necesario. Tipo di situacionnan di caos asina no ta aceptabel, den cual turistanan ta sali perhudica y no tin un draaiboek interno den e hotel mes kico pa haci, con pa haci y ken ta asumi liderazgo den tipo di crisisnan asina", segun e mandatario a expresa. 

PILAR DI TURISMO

Ta importante realisa cu turismo ta nos pilar economico di mas importante y ta tuma nos tur pa cuid'e. Tanto di banda di comunidad pero tambe sector priva. "Accidente semper ta pasa diripiente", segun e Minister encarga cu husticia. "Pero ta e forma con ta atende cu ne y alivia e consecuencianan y evita mas inconveniencia posibel, ta loke ta haci un diferencia grandi. Y eynan mi a nota cu tin hopi espacio pa mehoracion, tanto den medidanan di prevencion como tambe den procesonan con pa brinda servicio di hospitalidad, hasta den momento di crisis".