Cruz Cora Aruba a asisti cu caso di candela na Riu Palace

ORANJESTAD– Cruz Cora durante e caso di e candela na Riu Palace diasabra mainta, tambe a asisti. Tabata pa 9.30 di mainta, cu Cruz Cora Aruba ricibi un yamada pa pidi asistencia na RIU Palace y RIU Antillas ya cu tin un candela y mester yuda cu e huespednan di hotel. Mesora a manda un mensahe pa voluntarionan y nan a cuminsa acudi na Cruz Cora na Dakota.

VOLUNTARIO DEN GRUPO

Ya pa 10.05 a mobilisa 24 voluntario pa RIU Palace y RIU Antillas. A parti e voluntarionan den 3 grupo pa asina yuda huespednan cu mester tuma vuelo e mesun dia, otro grupo pa yuda huespednan cu mester tuma nan medicamentonan y e otro grupo pa huespednan cu asistencia medico.  Otro voluntarionan a guia huespednan pa nan busca nan pertenencianan den camber y bay checkout y registra na RIU Antillas. A parti awa pa hulpverleners y huespednan.  Tambe a acudi pa un team di PSP, esta Psychosocial Support di Cruz Cora y a traha un team di 7 voluntario specialisa den PSP.

GRADICIMENTO

En total a traha mas cu 30 voluntario durante 6 ora largo pa por a duna tur sorto di asistencia na e huespednan di nos isla na RIU hotel. Cruz Cora Aruba kier gradici cada voluntario cu a acudi mesora pa yuda y a haci esaki cu hopi dedicacion y curason. Tambe kier gradici KPA, Brandweer, DVG y DAS pa e bon cooperacion.