Candela den boiler room di Riu Palace Hotel

PALM BEACH - Un candela den boiler room di Riu Palace awe mainta 9'or a causa consternacion diasabra mainta riba e hotel strip. A compronde di representante di e doñonan di Riu, cu nan a caba yena e tankinan di e boiler room cu diesel, y despues diripente tabatin candela. Con esaki a sosode y kico e motibo ta, ta desconoci ainda pa tanto e doñonan como bombero. E candela a pone cu tabatin basta huma cu a afecta parti di e hotel abou, y a pasa pa cierto gangnan di e hotel. Bon ta cu segun e gerente nada mayor no a pasa cu ningun persona den forma grave, ni tampoco e turistanan. Ambulance tabata presente pa trata dos trahado cu a bira malo  debi na e huma/gas cu e candela a produci. Pero aparte di esey, no por papia ainda di un daño grandi. E operacion di e hotel a keda modifica un poco, pasobra a pasa e huespednan pa e otro hotel Riu, pa desayuno, pa por a haci limpiesa y control di e facilidadnan di cuminda. A cuminsa check tambe si e candela a afecta e cushina y otro areanan, pero te cu sa, esey no tabata e caso. "Ta bon cu nos tin e otro hotel den un caso asina" e representante di e hotel a bisa NoticiaCla.com. No tabatin necesidad di evacua ningun hende, pero si a haci un chekeo den tur gang y piso y camber pa wak si toch por tabatin un of otro tipo di daño. A yama e compania responsabel pa e liftnan, pa check aki tambe si tur cos ta ok. Fuera di esey, e hotel ta operando normalmente y no ta mira mucho mas problema fuera di e area unda cu e candela tabata.