De Meza: Negociacion cu CITGO dificil, largo pero mustrando bon

HOUSTON – E tono di negociacionnan na Houston pa logra reapertura di refineria ta tur cos menos facil. Manera ta conoci, negociacionnan a continua e siman aki na Merca entre gobierno di Aruba y e ehecutivonan di CITGO na Houston. Mientras cu no tin informacion concreto, por deduci di palabranan di e propio minister di energia di Aruba Mike de Meza, cu ta haciendo tur esfuerso pa keda cla, y cu e combersacionnan ta tur cos menos facil.

CAMINDA COMPLEHO

“E caminda ta compleho, hopi no por imagina pero nos tin fe y si nos por y si nos lo vence” de Meza a bisa diaranson ainda riba su pagina di Facebook. “Cos ta mustra bon, y nos tin un bon sentimento di e materia” e mandatario a sigui bisa. Segun e siman tabata progresa, e comentarionan tabata sigui. Un dia despues, e mandatario a sigui cu su comentarionan. “Reunionnan ta durante horanan largo na Houston”, e mandatario a sigui bisa. “Motivacion ta halto, y e gana ta positivo. Tur partido ta kere den e obhetivo final”. Como un push final, e mandatario ta skirbi cu ‘nos ta moviendo dilanti riba un paso firme y esey ta great’.

DEAL FINAL FIN DI LUNA

Tin informacion cu e mandatario lo mester ta bolbiendo Aruba e fin di siman aki pa despues e informa kico tur a sosode y con cerca of leu gobierno ta di e negociacion. Manera ta conoci, pa fin di e luna aki mester tin un acuerdo final pa dicidi si e refineria ta wordo cumpra pa CITGO of no.

STARTUP 18 LUNA

Tabata e siman aki cu prome minister a splica cu cos enberdad tabata bayendo basta bon, pero a mustra tambe cu si e refineria wordo cumpra mes awor, ta dura por lo menos 18 luna prome cu e refineria por ta cla pa startup. Pero tambe un luna despues cu firma e ‘deal’, lo cuminsa tuma trahado pa prepara e refineria pa e startup. Gobierno den cuadro di esey, a lanta un CITGO desk pa cuminsa recluta hende pa e diferente trabounan cu tin.