Seis sospechoso cu castigo di prison, uno posponi den caso taxista asalta

ORANJESTAD - Corte den Prome Instancia a dicta sentencia awe den e caso di e atraco arma riba un chofer di taxi, cu a lanta hopi stof den nos comunidad. E homber R.A.G. a wordo atraca violentamente pa un grupo di siete persona riba 26 di juli 2015 den area di hotelnan high-rise. Durante e atraco aki e taxista a wordo tira cu un arma den candela den su cara y a resulta gravemente herida. Tur siete sospechoso a wordo deteni den e lunanan cu a sigui. E caso a wordo trata riba 12 di februari ultimo. Notabel tabata e hecho cu corte a reduci e sentencia di practicamente tur e sospechosonan, si tene na cuenta e peticion di castigo cu fiscal a pidi. Pa loke ta e caso contra e atracador cu a supuestamente los e tiro, e homber A.S.E.E., a wordo posponi pa raportahe sicologico, y ta planea pa sigui wordo trata riba prome di april 2016.

E SENTENCIANAN

Pa loke ta e otro 6 sospechosonan, hues a dicta lo siguiente. Fiscal a exigi contra e sospechoso A.D.G. (19) un castigo di 7 aña, y ehecucion di jeugddetentie di 4 luna, pa cual el a wordo condena anteriormente den otro caso. El a wordo condena pa 4 aña di prison incondicional. Tambe Corte a duna ordo pa ehecuta e jeugddetentie di 4 luna. Fiscal a exigi contra e sospechoso J.C.C. (18) un castigo di 6 ana. El a wordo condena pa 4 ana, di cual 6 luna ta condicional.Contra e sospechoso S.A.G.S. (20) a keda exigi un castigo di prison di 4 ana pa complicidad den e atraco arma. El a wordo declara liber pa medeplegen y a wordo condena pa accesoria na e atraco pa 30 luna, di cual seis ta condicional.

MENORNAN DI EDAD 

Aki tambe hues a reduci e castigonan basta pisa pa e sospechosonan. Den e caso aki aunke cu tabata menor di edad, fiscal a pidi castigo di adulto. Algo cu hues no a bay di acuerdo cu ne. Contra e sospechosonan menor di edad J.J.H. (18) y A.J.J.V. (17), fiscal a exigi, aplicando ley penal pa adultonan, un castigo di prison di 5 aña. Sin embargo, Corte a haci uzo di ley penal pa hobennan y a condena nan pa 21 luna di jeugddetentie. E sospechoso C.-C.M.T. tabatin solamente 15 aña bieu tempo di e atraco. Contra dje a wordo exigi, aplicando ley penal pa hobennan, jeugddetentie di 9 luna, di cual dos ta condicional. Hues a dicta segun exigencia di fiscal pa loke ta T. Ministerio Publico ta considerando actualmente