Angel Bermudez: A comete un fayo cu asunto di nos presupuesto

ORANJESTAD- Aruba a actua corecto den asunto di su presupuesto. "Mi a sigui tur e discusionnan riba e procedura tuma door di Hulanda den caso di presupuesto y segun mi un faux pas a wordo comete ". Esey ta pensamento di minister nobo di finanzas Angel Bermudez, durante un entrevista na telearuba diadomingo anochi. E la uza e palabra ‘faux pax’ cu ta nifica fayo. Mientras cu e ta menciona cu e la sigui tur e loke cu Hulanda a haci, e no ta bisa si ken a comete un fayo, pero ta bisa mes momento si cu Aruba a actua corecto. Tambe e mandatario ta sigura cu contrario na informacionnan cu ta circula Aruba no ta bancarota. E tin placa pa paga su debenan y como tal no por considera e isla como bancarota. Un declaracion asina segun e mandatario, ta haci hopi daño den exterior. No tin ningun motibo pa pensa cu Aruba no por paga su debenan y como tal no mester haci declaracionnan manera cu a wordo haci.

E mandatario a repasa su experiencia e ultimo luna prome como consehero di awor ex mandatario di Finanzas Juan David Yrausquin y awor como minister di Finanzas e mes. Tur cos e la sigui di serca, tanto na Aruba como Hulanda y ta sigura cu Aruba a actua corecto. Fuera di esey, e la bisa cu e ta keda for di e discusionnan politico.