Elias: Concierto Rolling Stones ta pa mustra apoyo na Cuba

WILLEMSTAD – Corsou ta trece e grupo legendario The Rolling Stones cu Mick Jagger pa un presentacion gratis na Cuba. Esaki ta danki na un fundacion local di Corsou. Fundacion Bon Intenshon di e conocido filantropo Gregory Elias a logra regla esaki como parti di e entrada pa yuda Cuba sali for di e cocoon cu e ta. Basa riba esaki, Elias ta haya cu ‘nos mester duna nos apoyo y pa mustra e pueblo Cubano cu nos tambe ta yama nan welcome den e mundo nobo aki’ el a bisa NoticiaCla.com diahuebs.

MUSICA COMO INSTRUMENTO PA FORTIFICA AMISTAD

“Den e cuadro ey bo tin cu busca un instrument, cu no tin un aspecto negativo cu ne. Y esey ta musica” Elias a sigui bisa. Musica ta cera amistad, no tin color, no tin envidia. Y tur esey ta pone cu el a uza e medium ey pa duna e aprecio pa Cuba. Y via e coneccionnan cu Elias tin cu e mundo di espectaculo, el a tuma contacto cu e management di e grupo internacional grandi aki. Mirando cu e grupo ta den gira den Latino America y ta caba esaki mitar di e luna aki, a haci e peticion pa nan toca na Cuba. Y pa sorpresa di Elias, nan a acepta.

HOPI NEGOSACION PA LOGRA ESAKI

E no tabata algo facil segun Elias. “Hopi papiamento, hopi negosiacion pero nan (Cuba) a compronde e ‘bon intencion’ di e concepto. Sea bo ta bisa bo ta interesa of bo no ta interesa. Y nan tabata interesa”, Elias a bisa. E condicion tabata simpel. Elias su fundacion lo a paga e produccion y trece e grupo pa Cuba, pero e grupo Rolling Stones no por a cobra pa e concierto, y a pidi nan pa ‘perform’ pornada. Y aki tambe e grupo a bay di acuerdo. Esey ta pone cu por duna un presentacion completamente gratis pa tur Cubano y otro presentenan riba e isla aki. Den dos pa tres dia a keda cla cu e areglo, y aworaki tur cos ta keda cla pa Rolling Stones por toca pornada na Cuba. “Asina nos a yega cu por duna e pueblo Cubano un regalo bunita. Un regalo cu no tin ningun intencion bon of malo su tras. Uno simplemente honesto y transparente” Elias a bisa.

NOS TA TRECE COLUMBUS BEK DEN CARIBE

E grupo su historia ta un leyenda caba y ta data di for di añanan 60 ora cu ya caba nan tabata grandi. De hecho nan ta un di e unico nan cu ainda for di e tempo ey, ta activo musicalmente. “Nos ta treciendo Columbus bek atrobe den e parti di Caribe aki, pa re-inventa un pais bunita asina’ Elias a sigui bisa.

CORSOU SU NOMBER TA RESONA CU E CONCIERTO AKI

Notabel tabata e hecho cu den e noticianan publica di e evento historico aki, Corsou su nomber a resalta den practicamente tur publicacionnan internacional. Mientras cu esaki ta interesante, Elias a splica NoticiaCla.com cu ta un di su exigencia den e negosacionnan tabata cu si logra esaki, cualkier promocion of publicacion cu sali di nan banda oficialmente, mester tin mencion cu e cos aki ta un cos di Corsou pa Cuba. “No pami of pa ningun otro hende. Ami no ta conta. Ta pa Corsou. Mi ta purba di un forma chikito pa yuda tambe pa e nomber di Corsou (mare e por bira 50% igual di bosonan (na Aruba) ya cu boso ta hopi conoci) ta mas internacional posibel” e filantropo a bisa. “Bo tin e nomber di e grupo fama aki cu ta e grupo mas fama di mundo, bon tin un lugar Cuba cu ta yama atencion di tur hende, sea ta romantico of hende tin nan soño cu nan kier bay Cuba, si hinca Corsou aden bo ta dun'e un atencion hopi nechi y hopi bon PR.

FECHA DI CONCIERTO

E fecha di e evento, titula “El Concierto de la Amistad” ta diabierna 25 di maart proximo na Havana mes, den un parke un poco pafo di e centro mes, den un parke masha grandi mes. “E stage so di e yoncumannan aki ta un cos asina grandi y mester acapara asina hopi hende, pasobra no ta pa Cubano y turistanan so. E ta pornada y tur hende lo kier bay wak esaki. Por lesa e relato di Rolling Stones mes di nan website riba e concierto aki. E foto tambe ta di e website di rolling stones, www.rollingstones.com