Cantidad di hende riba 100 aña lo aumenta na Aruba den 10 aña

ORANJESTAD – Tin 14 persona na Aruba cu tin mas di 100 aña di edad, di cual 7 a nace na Aruba, y di e 14 persona 3 ta hende homber. E datonan aki a keda suministra durante e presentacion di posiblidadan cybernetico di director di Sociale Verzekerings Bank (SVB), Edwin Jacobs. E persona cu mas edad tin 106 aña segun Jacobs. “Cu Dios dun'e bida y salud, na mei proximo e ta cumpliendo 107 aña”.

50 HENDE RIBA 100 AÑA

Mes momento den e grupo di persona cu ta den e grupo di 100 aña plus, tin actualmente 6 persona cu tin actualmente 101 aña. Den e edadnan poco mas ‘jong’, entre 95 y 99 aña, tin na e momento aki 69 persona den e sistema cu ta biba na Aruba. Entre 90 y 94 aña di edad, tin 218 persona. Como tal, pa e proximo añanan, aki 10 aña e grupo cu ta riba 100 aña lo ta mas cu 14 persona y ta calcula te hasta, riba 50 persona cu lo tin mas cu 100 aña. Esey ta mustra cu e fenomeno di envehecimento ("vergrijzing") di e poblacion ta tambe notabel aki na Aruba y cu esaki ta bay sigui refleha den e añanan venidero den e cantidad di hendenan di edad avansa.