ATA ta confirma cu turista mericano no mester visa pa drenta Aruba

ORANJESTAD- Turistanan mericano no mester di visa y por keda aruba te cu un maximo di 180 dia. Aruba Tourism Authority a participa esaki den fin di siman un biaha mas, despues cu algun siman pasa NoticiaCla a raporta un incidente cu un turista cu a haya su mes perhudica pa motibo di un ‘malcomprondemento’ pa cu e regla di biahe pa Aruba. Segun ATA, turistanan Mericano cu ta doño di un propiedad na Aruba, sea ta timeshare, condominio, un cas of yate ta permiti pa keda Aruba pa un periodo di maximo 180 dia den un aña calendario. E 180 dianan por ta consecutivo of acumulativo durante diferente bishita den e mesun aña calendario.

Tabata CEO di ATA, Ronella Tjin Asjoe-Croes cu a declara cu Aruba Tourism Authority, DIMAS, Directie Buitenlandse Betrekkingen y Ministerio di Turismo ta consciente cu tin un confusion rond di e topico aki. Manera cu NoticiaCla a raporta tambe inicialmente, riba dia 11 di mei Ministerionan concerni, incluyendo ministerio di Turismo, ya caba a emiti un comunicado na Ingles y Papiamento splicando cu no tin cambio pa cu rekisitonan pa cu estadia riba nos isla y a delinea tur e rekisitonan incluyendo esnan valido pa bishitantenan cu kier keda riba nos isla pa un temporada largo (por ehempel haciendo uso di e termino maximo di 180 dia). E mesun informacion aki a bay tambe pa e aerolineanan den un carta separa. Fuera di e esfuersonan aki, partidonan concerni ta trahando riba clarifica locual ta aparece den TIMATIC cu ta e sistema di IATA cu entre otro aerolineanan ta referi na dje pa verifica ”travel document requirements”, pa asina sigui sigura cu no tin duda den interpretacion di locual ta reglanan pa cu estadia riba nos isla.

ATA a aserca Aruba Timeshare Association (ATSA) tambe sperando cu lo por yuda den distribui e informacion corecto y den agilisa e proceso pa bishitantenan cu estadia largo na Aruba, kende hopi biaha tin timeshare na Aruba. Asina ta spera di por traha cu otro partidonan tambe kende por comunica directamente cu esnan cu tin timeshare, propiedad na Aruba, yate etc.