Lo cuminsa implementa reglanan pa meld ziek pa empleadonan di KIA

ORANJESTAD Minister di Husticia Arthur Dowers, hunto cu departamento di recurso humano di gobierno (DRH), e siman aki a anuncia cu lo cuminsa cu implementacion di reglanan pa meld ziek pa empleadonan di KIA. E reglanan aki no ta nada nobo, pero ta puntonan stipula den LMA y den maneho di KIA existente, segun e mandatario ta splica. Esun cu ta meld ziek dos of mas biaha den transcurso di 28 dia ta bay riba un lista di ziektemelders frecuente y lo aplica reglanan un poco diferente pa nan. Asina ta protege esunnan cu ta meld ziek menos y ta preveni cu empleadonan ta meld ziek sin cu nan ta malo.

KEHO Y INDICACION DI AO

Dowers a splica cu tin kehonan y indicacion cu cierto empleadonan ta meld ziek sin cu nan ta malo, nan ta meld ziek pa bay concierto of fiesta, pasobra nan no tin gana di bay trabao, y hasta si ya nan ta na trabao caba y nan a rabia pa algo nan ta bay cas bisando cu nan ta malo. Esaki no ta e forma corecto pa anda cu otro como colega, y tampoco no ta e solucion ora cu tin un disputa of algo pasa cu causa nan pa ta rabia, e mandatario a bisa, añadiendo cu specialmente den e caso di un disputa e forma pa resolve cosnan ta di papia y discuti e asunto y no djis rabia y meld ziek, of sigui traha, pero "dal un AO" pa e siguiente shift(nan).

INFORMA EMPLEADONAN

E empleadonan di KIA lo ricibi informacion for di departamento di recurso humano tocante di tur e reglanan, nan lo wordo discuti internamente. Sindicatonan a discuti e puntonan aki caba cu DRH, y a cumpli cu nan peticion tambe pa no laga e empleadonan cu si ta cumpli cu trabao y e forma corecto di ziektemelding tambe cay bao di e reglanan mas estricto.

REGLANAN GENERAL

E reglanan general cu ta aplica ta cu tur empleado mester meld ziek por lo menos dos ora prome cu nan warda ta cuminsa. E otro regla general ta cu si e empleado ta na trabao caba e mester meld ziek na su hefe, e por bay cas e ora y mester meld e siguiente dia na SVb.

MELD ZIEK MAS BIAHA

Dowers a bisa cu esun cu ta meld ziek dos of mas biaha denter di 28 dia tambe mester meld dos ora prome cu su warda ta cuminsa, pero mester meld na un cierto momento y cerca un cierto persona. Tin otro puntonan cu ta bay na vigor tambe, of mas bien ta wordo implementa corectamente, despues cu tur empleado wordo informa di e reglanan.

EMPLEADO CU TA AO

Un empleado cu ta AO mester informa SVb y KIA unda e ta permanece (na su mesun cas of na otro luga) durante cu e ta malo, asina SVb por haci e controlnan necesario. Si un empleado mester sigui cualkier tratamento pa cual e no por of mester ta nan cas of unda e ta permanece p'e, esaki mester wordo comparti cu SVb pa asina e controlnan bay debidamente. Si e empleado bira malo durante cu e ta den exterior e mester trece un carta di un dokter di e pais ey y mester entrega copia na KIA y na SVb; no ta necesario pa e dokter bisa kico e empleado tabatin, pero si cu e ta of tabata malo. Asina tin diferente otro regla cu lo wordo implementa, incluyendo e regimen pa esunnan cu ta meld ziek cu frecuencia.