Studiantenan precupa cu ainda no a ricibi placa prome cu biahe

ORANJESTAD – Studiantenan cu tin cu biaha pa Hulanda y (otro destinacion tambe) diamars awor, ta precupa cu no a ricibi placa di estudio prome cu e biahe. Un grupo di mayor tambe hopi rabia pasobra ainda e placa di estudio no ta riba cuenta di e yiunan. Nan ta te hasta evaluando pa no laga nan yiu(nan) biaha diamars, si prome cu esey nan no por haya un siguransa cu e placa lo ta riba e cuenta prome cu diamars awo. Nan ta rabia pasobra nan a firma un contracto cu gobierno, cu for di 1 di augustus e placa lo ta deposita riba e cuenta, y tambe transferi den euro. Y via via, nan a bin tende awor cu e placa lo ta deposita riba e cuenta di studiante despues cu e studiantenan yega Hulanda, pa ‘evita cu e studiante dicidi di gasta e placa prome cu e biaha’.

Varios mayor a acerca NoticiaCla pa ventila nan rabia riba e asunto, ya cu nan ta precupa pa e bienestar di nan yiu. ‘Con mi por laga mi yiu biaha sin cu e placa ta riba e cuenta?’ ta un otro reaccion di un mayor disgusta. “Mi ta evaluando seriamente hunto cu algun mayor, pa no laga mi yiu biaha mas, si e placa no ta riba e cuenta y si mi no haya un siguransa”. Di otro banda, NoticiaCla a tende di un otro mayor cu tambe a tende ‘via via’ cu e motibo pa no tin placa deposita ainda ta ‘evita cu e placa ta wordo gasta y cu ta algo masha normal y cu a wordo haci antes caba’. Nan pues, no tin problema cu e asunto aki. Nan, contrario na e otro mayornan, tin pleno confiansa cu e placa lo ta riba e cuenta di e yiu, manera cu nan tambe a tende, diaranson awo. 

Loke ta precupa e mayornan disgusta ta cu nan no tin confiansa mas den e situacion pasobra si nan a firma un contract cu ta bisa cu e placa ta riba e cuenta di banco 1 di augustus siendo cu esaki no a sosode, ken por garantisa cu e placa ta riba e cuenta un dia despues cu nan yega. “No tin ningun instancia a bisa nos esaki oficialmente” un otro mayor cu no kier a uza su nomber ainda, a bisa NoticiaCla diadomingo.

E problema segun algun mayor ta cu studiantenan cu ta den region, ya caba a haci commitments pa camber etc entrante 1 di augustus, pensando cu e placa lo ta riba e cuenta, pero no a logra haya e camber awo debi cu e placa no tabata riba e cuenta segun stipulacion di contract. “Pues e asunto ta bay mas leu cu tin placa pa gasta ora yega Hulanda” un mayor a bisa. “Y si e gasta e placa awor, esey ta su derecho pasobra e la firma pe y tin derecho riba dje. Ta su responsabilidad after all pa paga e placa aki bek”.

NoticiaCla a haya un copia di un contract (wak e contract aki )unda cu enberdad ta poni cu e placa lo wordo poni 1, riba 1 di augustus 2014 y 2. E lo wordo converti na euro prome cu e studiante biaha. Ningun di dos te cu diadomingo, no a tuma lugar ainda. E grupo di mayor ta rabia cu nan no a tende nada oficialmente di ningun oficial di enseñansa y tampoco di ningun minister. Nan ta spera cu diadomingo atardi, durante un encuentro cu minister Michelle Hooyboer Winklaar, nan lo por haya claridad riba e asunto aki. Intentonan di NoticiaCla pa haya informacion riba e asunto a wordo haci for di diabierna, pero te cu diadomingo, ningun instancia ni minister no a reacciona riba e peticion di NoticiaCla.