Gobierno a bolbe perde caso riba cambio di destinacion di tereno

ORANJESTAD – Gobierno di Aruba a perde otro caso den corte awe mainta cu ta trata cambiamento di destinacion di tereno. Mientras e ta di dos caso cu gobierno ta perde di e indole aki, e biaha aki e area ta diferente, esta na Saliña Serca. Un biaha mas tambe esaki ta trata un grupo di habitante (4 e biaha aki) cu a demanda gobierno (lesa minister di infrastructura Benny Sevinger) pa no haci e cambio di un tereno pa uzo personal, pa uno comercial. Hunto cu gobierno, e propietario di e tereno, sr Porco Gallina tambe a wordo prohibi pa sigui cu e plan pa desaroya e tereno den algo comercial. Y pa sigura cu esey no ta wordo viola, a impone un multa di 25 mil florin pa dia te maximo di 25 miyon florin. E ta practicamente igual na e sentencia di e caso di Boutique hotel Ocean Z unda cu aki tambe hues a prohibi gobierno pa haci e cambio. Ambos, te ora cu un hues di un bodemprocedure (caso profundo) tuma lugar.

CAMBIO DI DESTINO

Den e caso aki ta trata e hecho cu e persona Porco Gallina a pidi un cambio di destinacion di tereno, pa hacie uno comercial unda cu inicialmente e kier a traha 4 apartamento pa huur cu turista. Esaki a bay bon, unda cu DIP ta entre otro un di e instancianan cu no a mira problema pa tal. Pero despues di control di DOW cierto momento, a resulta cu a cuminsa traha apartamento sin cu a otorga e permiso di construccion. Fuera di esey, a constata cu tabata trahando no 4 sino 8 apartamento. DOW mesora a manda un carta di protesta y a ordena Porco Gallina pa para e construccion mesora. Algun luna despues, durante un otro control, atrobe a constata cu e construccion a continua, unda cu un biaha mas a para tur trabou riba orden di DOW.

GOBIERNO A FAYA

Hues a hala atencion tambe di gobierno riba su forma di actua, of den e caso aki, falta di actua mientras cu sa cu tin algo ilegal tumando lugar. A tuma gobierno na malo pa no a actua y cu gobierno a faya den e caso aki. Lesa e sentencia aki.