Corte a ratifica suspension di ex director Aruba Airlines

ORANJESTAD - Awe mainta corte di prome instancia a ratifica e medida di orden tuma recientemente contra ex director di Aruba Airlines, Onno de Swart y a prohibi'e pa intermedia, forma parti of actua na nomber di e compania. Cualkier intento of forma cu e haci esaki toch, lo impone un multa riba dje di 25 mil florin te un maximo di 25 miyon florin. E sentencia ta pues mas bien un ratificacion di e medida y un splicacion mas detaya di Corte riba e tema ey. 

E CASO 

Hues a suspende director di Aruba Airlines Onno de Swart 10 di februari pendiente un caso sumario cu a tuma lugar dia 19 di februari, y a apunta accountable manager Hubert Zievinger como director interino di e compania. Esaki ta a consecuencia di un desacuerdo formal den e compania entre partidonan cu a pone cu hues mester a tuma un decision asina drastico. Mirando cu abogado di de Swart a informa cu no ta necesario pa impone un medida di orden pasobra partidonan lo tene nan mes na e orden di hues, no a dicta tal.

DEMANDA DI SEASTAR HOLDING

Den corte e compania Seastar Holding NV a demanda pa hues impone e medida di orden contra de Swart, pa te ora cu e caso sumario tuma lugar entre partidonan, de Swart no por mete cu e asuntonan di e compania Aruba Airlines, y cu e tin cu deshaci di e cambionan haci den e directiva manera cu el a haci den registro di Camara di Comercio. De Swart a protesta inicialmente, pero e abogadonan a priminti cu lo cumpli cu e peticion ey.

DIFERENCIA DI OPINION

Tabata hopi cla den Corte cu partidonan, tin un diferencia di opinion grandi di ken ta manda den e compania oficialmente registra como Arubaanse Luchtvaart Maatschappij, conoci comercialmente como Aruba Airlines. Pega na esey, partidonan tin un diferencia di opinion di kico e necesidadnan financiero di e compania ta, con por cumpli cu esaki, y si mester ubica accionnan nobo y si mester aumenta e capital di e compania.

DIRECTOR INTERINO 

Hues a mustra den Corte cu ta bisto cu no solamente e partidonan sino e compania mes lo mester haya un director interino. Durante e caso, Hubert Zievinger a mustra di ta dispuesto pa keda nombra den e funcion. Su funcion actual ta accountable manager. Y a compronde for di documentonan cu Directie Luchtvaart Aruba tambe tin confiansa den Zievinger.

VEREDICTO FINAL 

Como veredicto na final, hues a pues suspende de Swart di tin cualkier funcion den e compania y ta prohibi'e di actua como hefe den e compania. Mes momento e hues a pasa pa nombra Zievinger como director interino cu autoridad di director statutario y unico miembro di directiva. Ademas a prohibi pa yama cualkier reunion di accionista di e compania, y a dicta tambe cu asina cu tin un otro sentencia den e proximo caso sumario riba e tema, cu e veredicto actual ta vence. Awor e sentencia ey a keda ratifica. Lesa e veredicto aki.