Personal ARA ainda no tin solucion pa parkeer

ORANJESTAD – Cuater luna despues cu personal di Algemene Rekenkamer a haya nan mes den un situacion cu nan lugar di parkeer, awe ainda nan tin e problema sin solucion. Y awe nan ta mustra cu nan ainda kier un solucion. “Ainda (gobierno) no a percura pa regla un lugar pa parkeer adecua”. Nan ta sinti cu nan peticion cu nan a manda pa un solucion, no a wordo tuma na serio. Como tal, nan a dicidi di bay publico cu e informacion un biaha mas. Nan kier evita cu lo mester bay den protesta pa algo basico manera esaki. 

NO POR EHERCE TRABOU DI CONTROL DEBIDAMENTE

Tabata dia 2 di november 2015, cu gobierno a cera e parkeerplaats di Algemene Rekenkamer (segun ARA sin previo aviso) y sin cu a percura pa un alternativa. Segun e comunicado cu ARA su personal a manda, e personal ta wordo stroba pa ehecuta nan trabounan di investigacion debidamente, na un manera eficiente y sigur. Nan mester uza nan propio vehiculo pa eherce nan tarea di control, pero no ta dispone di un lugar pa parkeer nan vehiculo.

PLAZA PADU

E parkeerplaats di Algemene Rekenkamer a wordo destina pa construi Plaza Padu, cu lo wordo inaugura dia 18 di maart proximo. Segun e personal, nan mester tin e flexibilidad di uza nan vehiculo di motor na cualkier instante cu esaki ta wordo rekeri di nan. Nan mester por sali y bin bek sin cu esaki ta bai na costo di e eficiencia di nan trabou. Ademas di esaki, e personal ta dispone di documentonan confidencial cu ta rekeri cautela pa cual seguridad ta un factor importante.

A BUSCA SOLUCION NA MANERA PRO-ACTIVO

For di momento cu personal di Algemene Rekenkamer a wordo informa cu ta existi e posibilidad cu lo bai perde nan parkeerplaats, nan a tuma contacto di biaha cu e instancianan concerni pa por regla un solucion pa e problema premira di parkeer. Esaki tabata na final di augustus 2015, cu tabata e mesun temporada cu e instancia di Aruparking a wordo estableci. Personal tabata (y ta) dispuesto pa paga pa un vergunning, pa asina dispone di un luga den cercania di nan edificio manera cu ley di parkeer ta stipula. No obstante esaki, e peticionnan di personal di Algemene Rekenkamer, pa regla un lugar di parkeer sea via Aruparking of sea via Gobierno mes, no a wordo scucha como cu tabata wordo bisa na e momento ey cu ‘ainda Algemene Rekenkamer ta dispone di su parkeerplaats’. Despues cu enberdad e parkeerplaats di Algemene Rekenkamer a wordo cera sin cu a regla alternativa, e personal a bolbe tuma contacto cu e instancianan concerni y cu ministernan encarga. A manda carta y sugeri alternativanan na minister di transporte, minister di infrastructura, minister di asuntonan general como tambe Aruparking. Apesar di promesanan cu lo percura pa un solucion, te cu dia di awe nada no a wordo regla pa personal di Algemene Rekenkamer.

PETICION NO TA WORDO TUMA NA SERIO

Personal di Algemene Rekenkamer ta sinti cu nan peticion pa regla un otro lugar di parkeer no a wordo tuma na serio. Esaki mirando cu nan peticion a bai pareu cu peticionnan di varios otro instancianan Gubernamental. Personal di Algemene Rekenkamer tin confirmacion cu otro instancianan si a haya acceso na un lugar alternativo pa parkeer sea via Gobierno mes of via Aruparking den cercania di nan edificio. Ta di lamenta cu e unico lugar di parkeer cu a wordo ofreci via Aruparking na personal di Algemene Rekenkamer ta na punta final di e parkeerzone, na rand di Lagoen (ex-Valero). Esaki no ta den cercania di nan lugar di trabou.

PERSONAL TA BOGA PA UN SOLUCION

Personal di Algemene Rekenkamer un biaha mas kier a manda un suplica na e Ministernan concerni, como tambe na Parlamento di Aruba, pa yuda nan haya un solucion structural mas pronto cu ta posibel pa asina nan por eherce nan trabounan na un manera eficiente. Personal di Algemene Rekenkamer ta ripiti cu nan ta dispuesto pa paga y tambe cana pa por tin acceso na nan vehiculo, tanten cu ta trata di un lugar den cercania y sigur. No obstante cu secretariado di Algemene Rekenkamer tin falta di personal, ta aspira pa ehecuta nan tareanan mas eficiente posibel. E personal existente kier enfoca cu mirando e hecho cu nan mester uza nan propio vehiculo, ta e deber di un bon dunador di trabou pa percura pa un lugar di parkeer den cercania pa staciona esaki. Nan kier evita cu lo mester bai den protesta pa algo basico manera esaki. E potret principal ta di e forma con e lugar di parkeer a keda awor, y e otro ta e forma con e tabata.