Croes: Awe aumento di sueldo minimo cu 2.5% a drenta na vigor

ORANJESTAD - Awe aumento di sueldo minimo cu 2.5% a drenta na vigor. Inicialmente e fecha cu tawata proponi pa cu e aumento aki tawata 1 di februari 2016, pero esaki no a logra pa motibo di textonan huridico cu mester a cana nan caminda. Sinembargo, awo si entrante prome di maart e sueldo minimo a bira oficialmente 1677.80. E aumento aki ta refleha 2.5 porciento compara cu e ultimo biaha cu esaki a wordo introduci.

MANEHO DI GOBIERNO

Manera ta conoci, maneho di Gobierno ta dirigi riba tur e ciudadanonan di nos sociedad y den e caso aki tin un grupo grandi di nos sociedad cu ta hayando un sueldo minimo. Pa tal motibo ta haña na su lugar despues di a haci diferente consideracion riba e aspectonan di desaroyo economico, crecemento y inflacion pa subi e sueldo minimo. Tumando tur e consideracionnan aki na cuenta, Gobierno di Aruba, y hunto cu tur e Ministernan den conseho di Minister a bay di acuerdo pa desvia for di conseho di "Sociaal Economische Raad" (SER) cu en bes a propone un aumento di 1%. Despues di evalua tur aspecto a dicidi cu desde prome di maart ta bira e fecha oficial cu nos ta conoce un aumento riba e sueldo minimo. Minister Croes ta considera esaki un aumento chikito y responsabel, pa asina no crea otro efectonan den nos comunidad. Mientrastanto ta pidi tur comerciante y empleado pa tene esaki bon na cuenta.

CRITICA DI RAAD VAN ADVIES Y GREMIONAN

E aumento aki a causa basta indignacion serca gremionan y Raad van Advies, cu a conseha contra esaki. De hecho Sociaal Economisch Raad a recomenda net mitar di e aumento, pero gobierno a opta pa no tene nan mes na e conseho y aumenta esaki te na 2.5%.