Minister di salud ta compronde frustracion di sindicato den caso di SABA

ORANJESTAD – Minister di salud Alex Schwengle no tabatin ningun bon palabra pa e directiva di SABA. De hecho, si ta pa e mandatario, e directiva lo mester retira, pone hende nobo y bin cu statutonan nobo. E mandatario a bisa abiertamente cu e ta compronde e frustracion di e sindicato den nan accion awe mainta y ta grandemente sostene nan den esaki. Repasando un lista largo di keho, tabata bisto cu e mandatario ta hopi frustra riba e situacion di SABA. Y e no tabatin problema pa bisa esey tampoco dialuna mainta den un conferencia di ultimo ora pa repasa e situacion cu a surgi ora cu e trahadonan a bay den accion pa 2 ora.

YEN DI PROBLEMA

E mandatario ta mustra cu e.o. e tin problema cu e maneho financiero di e lugar. Entre nan, e cuentanan anual cu no ta indica cuanto placa na donacion e fundacion SABA ta ricibi. No tin un transparencia den e fundacion pa e parti financiero. A uza Wit Gele Kruis como ehempel di con si cos mester bay. De hecho a mustra cu WGK tin e mesun statutonan pero cu nan si ta duna cuenta di cada florin cu nan haya y uza. “Nan ta pone nechi nechi den raport” Schwengle a bisa. Ademas, ta laga eherce un control independiente financiero, contrario na e practica di SABA. “SABA ta bisa no, nos raad van toezicht mes ta keur e (Jaarrekening) goed, cu a traha den gobierno. Ta un berguensa cu e persona aki no ta haci su huiswerk” e mandatario a sigui bisa. “Pues mi ta di acuerdo cu e vakbond, di bisa cu nan si lo kier mas transparencia”. Problema segun e mandatario ta cu e no tin forza pa haci tal debi na e statutonan cu ta prohibi’e di haci algo. “E unico manera cu mi por haci algo cu SABA, ta stop e subsidi'e." Pero e mandatario ta mustra cu e no por haci esey, pasobra no por paralisa e operacion ey. Algo cu SABA sa y ta abusa di dje.