Lo warda e caso prome cu dicidi riba permiso di Ocean Z

ORANJESTAD – Minister di salud lo warda e caso di corte otro siman pa dicidi kico ta haci cu e permiso di hotel pa e compania Sizzu Properties. NoticiaCla.com diamars a puntra e mandatario riba e tema, pero mucho e no kier a bisa. “Mi no a nenga nada. Mi no a firma”, Schwengle a contesta riba e pregunta si nenga pa duna e permiso, cu a pone cu e compania a entama e caso pa otro siman dia 7 (lesa e articulo ey aki). Y segun e mandatario, e sentencia di januari ‘tabata para bon cla cu tur consehero ta bisabo pa warda e bodemprocedure (caso a fondo). “Si bo corte ta pidi bo of recomendabo cu ta bin un bodemprocedura y djey ta firma, ami ta warda” Schwengle a bisa.

PROCEDURA PERMISO TA ANTICUA

A puntra e mandatario cu si no ta pa e caso ey, si mandatario lo a firma, el a bisa si. E hecho ta cu e proceso di permiso ta poco straño hinca den otro. “Mi no ta full di acuerdo con e ta hinca den otro, pero esey ta un otro tema” e mandatario a bisa, mustrando su desaprobacion di e sistema anticua. E forma con a maneha e proceso aki segun Schwengle, ta pone cu na final di dia ora cu e documento yega serca dje, e ta haci un check riba tres punto. “ Higiena, seguridad y si tur partido bisa bo cu ta un ‘go’, mi ta firma”. Pero mes momento e mandatario ta bisa cu si e tin algo contra, of duda den esey, e tin derecho pa haci un investigacion extra. Pero normalmente e procedura ta hopi standard. “Pero den e caso aki tin un orden di corte cu ta bisabo, warda un rato riba un bodemprocedure. Mi no ta wak nada malo warda riba e bodemprocedure”.

DESTINACION DI TERENO TA PROBLEMA

E problema den e caso aki tabata e bestemmingsvergunning, esta e destinacion di e tereno. Esey tabata e huma of candela cu a pone cu e permiso ey no tabata cuadra. Si no tabatin esey, e mandatario lo a firma. Pa ley, e mandatario lo por a firma e permiso si e kier, pero e lo a haya su mes cu yen di caso y mas intrankilidad di otronan cu tambe por ta den e mesun situacion. “Si huez bisa mi tin cu actua otro, so be it. No tur ora algo ta ‘zwart wit’. Echt niet” e mandatario a finalisa bisando. E caso mes ta tuma lugar 7 d maart entre Zizzu Properties y gobierno di Aruba.