Personal di 4 cas di cuido di anciano den accion awe mainta

ORANJESTAD – Un accion di 2 ora awe mainta cu a cuminsa 8’or na tur e casnan di cuido di anciano di Stichting Algemene Bejaardenzorg Aruba (SABA) , a paralisa e operacion parcialmente. E accion yama pa e sindicato cu ta representa e trahadonan esta ABV, ta pa (entre otro) protesta decision di gerencia pa re aloca e trahadonan pa otro facilidadnan entrante 1 di april proximo. Segun Maduro, nan a manda un carta pa directiva cu varios punto, pero a ricibi contesta negativo pa e proposicionnan. Entre nan e asunto di mudamento pa San Nicolas.

DECISION NO TA BON

Maduro ta acepta cu e afdeling aki (Reseda) ta uno bastante bieu, pero e no ta un situacion cu ta bay cay den otro den 24 ora. “Ta 20 aña caba e situacion ta asina. Renobacion mester a tuma lugar masha tempo caba, pero cu no a wordo haci. E lider sindical ta mustra cu un decision sin mas a wordo tuma, unda cu entrante 1 di april mester bay e localidadnan diferente. Segun Maduro, e ta un cambio grandi pa tanto e trahadonan como e grandinan cu a biba añanan akinan y a custumbra cu e team y e trahadonan.

LISTA DI PROBLEMA TIN

E problema segun Maduro, no ta solamente di Reseda, sino e management team completo. Ta trata di un lista di por lo menos 5 punto, di cual e ultimo (realoca e personal di un departamento completo) tabata e ultimo gota. “E forma, e abuso laboral cu ta tuma lugar, di con ta trata e trahadonan. No tin respet pa e trahadonan ni pa e sindicato” Maduro ta sigui bisa. Apenas 4 luna e sindicato ta representa e trahadonan, pero e problemanan eyden ta multiple di añanan largo. “Intimidacion, warning, ziektemelding pa loco door di falta di personal. Un trahado tin cu produci pa tres, y ora bo meld ziek, nan ta straf bo” Maduro a bisa.