Kock: Solucion di ABV no ta resolve e problema di falta di personal

ORANJESTAD – E accion di dos ora di e trahadonan di SABA awe mainta no a paralisa e operacion na e casnan di anciano. Esaki ta e reaccion di e director Bremo Kock na NoticiaCla.com awe mainta. Pa loke ta e situacion, Kock ta splica cu e proceso di cambio ta tumando lugar basta tempo caba, cu e meta pa e cuido di nos grandinan keda riba un nivel profesional. Sigur den caso cu no por a haya personal pa traha. Pa por a garantisa un continuidad cu personal limita, a rekeri un restructuracion, den forma di un consolidacion di e personal cu tin. Asina por lo menos pa sigura cu cada departamento tin suficiente hende pa por traha y duna e servicio profesional.

TUR PROPIEDAD TIN HENDE TA TRAHA

Segun Kock, oficialmente nan no a haya notificacion di e accion di awe mainta, sino mas bien den wandelgangen esaki tabata core. Ta ayera nochi laat e director a bin tende oficialmente di e accion aki. “Nos tabata prepara just in case. Mi tin tur mi gerentenan on property riba tur tres propiedad pa wak cu e cuido por sigui” Kock a bisa. E mes a cana rond y nota cu e grandinan ta hayando e cuido cu nan mester haya.

SINDICATO NO TIN SOLUCION PA E PROBLEMA

Pa loke ta e puntonan cu e sindicato ta protestando, Kock a mustra cu tin un problema pa e mudamento proximamente di un departamento completo. “Nan (e sindicato) no kier pa e team di e afdeling cu ta bay cera por wordo saca for di otro” Kock a bisa. “Nan kiermen cu nan kier e team keda hunto. Nan punto ta cu saca e team aki y hinc'e otro caminda nan kier, pero hunto”. Pero e director ta mustra cu a manda un carta dialuna, esey lo no soluciona e problema. “Loke mi ta logra cu esey ta cu mi ta pone e popchi di localidad A, pone e mesun popchi na localidad B, sin cu mi a cera e buraco. Ta juist esey mester cera e buraconan pa e presion di trabou baha” Kock a bisa.

DISPUESTO PA PAPIA

E director ta dispuesto pa sinta cu e sindicato manera cu e sindicato a pidi. Pero no ta asina cu nunca nan ta sinta. Segun e director, un biaha pa luna e sindicato ta sinta cu e directiva. “No ta asina cu nos no ta sinta cu nan. Nos ta hopi abierto”.