Gobierno tin su candidato pa proximo Gobernador di Aruba

ORANJESTAD – Gobierno di Aruba tin nan candidato pa bira e proximo Gobernador di Aruba. Awe mainta prome minister Mike Eman a confirma na NoticiaCla.com, cu nan tin un persona, a acerca e persona y e ta dispuesto pa asumi e encargo. Ademas a confirma cu e persona no ta un persona politico. E proceso awor ta cu lo presenta esaki den varios scenario pa asina wak si por haya un ‘draagvlak’ amplio prome cu presenta e candidato na conseho di minister di Reino pa e aprobacion final.

PROCESO PA KEDA CLA

E intencion ta pa prome cu e actual Gobernador retira (na mei proximo), cu e candidato nobo ta cla y aproba pa wordo huramenta. Si esey no logra, lo pidi e actual Gobernador pa sinta un periodo chikito (a menciona 2 luna) pa duna chens pa e proceso keda cla. Di otro banda, ta keda e opcion tambe pa e Gobernador interino tuma e rienda tanten cu e proceso no keda cla. Keda pendiente pa mas informacion.