Grabacion nobo di nos himno cu orkesta filharmonico Mericano

ORANJESTAD — Mas di 40 artista a graba e himno di Aruba siman pasa na New York hunto cu un orkesta filharmonico. Ta e intencion pa entrega e ‘master tape’ di e grabacionnan aki na Gobernador saliente di Aruba Fredis Refunjol.

HOPI AÑA CU NO A GRABA HIMNO

Cuarenta cantante Arubano a uni nan mes cu un orkesta filharmonico di 60 persona den e DiMenna Center for Classical Music na Manhattan. Ta prome biaha cu ‘Aruba Dushi Tera’ a wordo graba cu un orkesta asina, desde fin di 1975 ora cu el a wordo graba pa un orkesta Venezolano y e coro “Vivont en Chantant’ di Rufo Odor, prome cu el a keda presenta oficialmente como himno di Aruba riba 18 di maart 1976.

40 GRABACION PA 40 AÑA HIMNO

"Ta 40 grabacion pa 40 aña himno. Plus un cantidad di presentacion aparte cu varios instrumento” esun cu a inicia e proyecto, Jonathan Vieira a bisa. “E artistanan ta participa gratuitamente, y ta drumi 3 den un camber. Solamente nan pasashi y estadia a wordo paga”, Vieira a sigui bisa. E proyecto ta costa 100.000 dollar y no ta wordo financia pa gobierno sino pa instancianan priva.

MASTERTAPE PERDI

Vieira a bisa cu el a bin riba e idea despues di un combersacion cu Gobernador. “El a conta mi cu pe, ta un cuestion cu tin un solo grabacion di e himno, cu ta wordo uza pa tur cos, cu ta esun cu a wordo graba na Venezuela bou di direccion di Anibal Abreu. Un problema adicional ta cu di e grabacionnan ey, e master tape nan ta perdi hopi aña caba. Segun Vieira, e storia como tal no ta cla. “Asina tin hopi rumor cu ta bisa cu e no a wordo entrega pasobra no a paga pe. Hopi di esnan envolvi mientrastanto no ta na bida mas, pues mi ta supone cu nunca nos lo no sa kico en berdad kico a pasa cu e tapenan maestro”. E grabacion ey a wordo poni riba vinyl di 7 inch diki. “Dado momento el a wordo digitalisa y ta wordo uza te dia di awe, na eventonan oficial”.

GRABACION APARTE

E aña aki ta tambe 40 aña desde cu e composicion di Padu Lampe y Rufo Wever di 1952 a bira e himno oficial di Aruba. Pues, a nace e idea pa uni 40 cantante, algun conoci y otronan no, pa cada uno graba un version. Pa eventonan special lo wordo uza cada e grabacion apropia. “E unico cu mi ta pidi ta, pa si haci ganashi cu e grabacionnan aki, pa e entradanan aki wordo duna na instancianan deportivo local, cu semper gobierno a sostene”, Vieira a sigui bisa.

Autor: Ariën Rasmijn