Trabounan di limpiesa di beach despues di Flip Flop a cuminsa trempan

ORANJESTAD - Ta for di trempan caba e accion di limpiesa di Eagle Beach a inicia, despues di e Flip Flop Festival by Chill, cu a atrae un publico di casi 10 mil hende. Tur aña e evento ta crece mas, tanto den e cantidad di gruponan musical cu ta presenta, como atendencia masal di publico fanatico di cerbes Chill.

TRABOU GRANDI DI LIMPIESA

Pero mescos cu e dos otro añanan, e biaha aki atrobe e ekipo grandi di Brouwerij Nacional Balashi y nan compania ruman Ecotech, a percura pa trabounan grandi di limpiesa despues di e actividad publico na lama. Y mescos cu e otro añanan, e beach lo keda mas limpi di locual e tabata mes.

LIMPIESA ORA CU SOLO A SALI

Mesora despues di e evento, cu a caba di marduga, a start cu e esfuersonan di limpiesa, cu a continua mainta ora solo a sali. E accion a inclui limpiesa riba beach y den lama mes, uzando buceadonan pa saca tur cup, bleki of cualkier otro sushedad cu a bay lama.

TOTERNAN UBICA STRATEGICAMENTE

Durante e evento mes, Balashi a instala decenas di toter di Ecotech na luganan strategico riba beach. Obviamente, cu e cantidad grandi di hende cu a atende e evento, e luga ta keda sushi despues. Asina cu solo a sali a sigui cu e trabounan y a laga e luga limpi. Claro cu, como cu ta santo blanco, semper tin un cup of bleki cu por a keda bou santo. P'esey e mesun trabounan lo sigui pa dos dia mas, pa garantisa cu e beach ta keda limpi-limpi.

RESPONSABEL PA TENE LUGAR LIMPI

Brouwerij Nacional Balashi ta conoci pa su responsabilidad corporativo, pa ta bon organisadonan di eventonan publico grandi, pa promove entretenimento, pero ta laga e luga limpi na final. Esey no ta un excepcion e biaha aki tampoco. Lamentablemente un persona a saca un potret mainta trempan y publica riba red social, pa purba insinua cu e compania lo a bay laga e beach sushi atras y sin haci limpi. Claro, cu tur hende cu a pasa beach mainta of a bay lama manera ta custumber riba diadomingo, por a mira cu nan mesun wowonan cu esey no ta berdad y cu e beach ta limpi caba.

CRITICA

No obstante e hecho cu a haci e esfuerso y trabou pa limpiesa, tabatin critica riba rednan social di esnan cu a haya cu e beach despues di e festival a keda sushi. De hecho, a cuminsa circula potretnan di sushi cu a keda atras, y cu turistanan lo tabata keha. Sinembargo mesora e organisadonan di e evento a reacciona, mustrando riba e trabou di limpiesa, y cu e beach a keda mas limpi cu ora cu nan a haye prome cu e evento.