A celebra fecha di independencia hunto cu e colonia Dominicano

ORANJESTAD Den fin di siman a tuma luga celebracion di e fecha di independencia di Republica Dominicano. Aki na Aruba a organisa un evento protocolario na e busto di Juan Pablo Duarte Diez, den cual a conta cu presencia di Gobernador y varios minister y parlamentario.

REPRESENTACION DI GOBIERNO

Mester menciona cu den su discurso, Minister Mr. Drs. Arthur Dowers a felicita e comunidad Dominicano residencia na Aruba, den nomber di henter Gobierno pero specialmente tambe di Minister Presidente Mike Eman cu no por tabata presente pa motibo di su biahe pa Hulanda. E mandatario a expresa su satisfaccion pa e forma con e colonia Dominicano a sa di integra den nos cultura y a bira parti di nos comunidad.

CONTRIBUCION DI E DOMINICANO

"Loke a wordo demostra cu e comunidad Dominicano, cu tur e añanan cu nan ta biba na Aruba, nos por bisa awe cu e contribucion cu nan ta duna, mi ta kere cu nos por bisa cu e cultura cu nos conoce awe tin e vibra Dominicano tambe den dje", asina Minister Arthur Dowers a enfatisa durante su discurso entre un cantidad di invitado y parti di e comunidad Dominicano residencia riba nos isla.

NAN TIN NAN MESUN PLENCHI

"E hecho cu nan tin nan mesun plenchi aki y cu nan mes ta mantene di un forma masha ehemplar, ta mustra e importancia cu ta duna na e dia aki", e mandatario a enfatisa. No solamente importante den historia, pero tambe pasobra esaki ta un momento importante cu a cambia historia y cu a pone cu hopi di nos hendenan ta haci tur lo posibel pa mantene e libertad den un pais.