Ainda tin hopi pregunta riba e enfermedad Zika

ORANJESTAD Probablemente tin hopi pregunta y publico lo kier mas acceso na informacion relaciona cu e enfermedad Zika, cu ta birando un reto pa salud publico na nivel internacional. Aki na Aruba, Departamento di Salud Publico a activa mesora y a laga instala un number di telefon cu ta disponibel 24 ora pa dia y 7 dia pa siman, cla pa contesta tur pregunta relaciona cu Zika.

VIRUS ZIKA

Manera ta conoci, mescos cu Dengue y Chikungunya, Zika tambe ta un virus transmiti pa sangura y ta ocasionando hopi inkietud mundialmente. E sintomanan mas comun di Zika ta keintura, rash na curpa, dolor di joint y wowo cora. Otro sintoma cu Zika por ocasiona ta dolor di musculo y dolor di cabes. E sintomanan mayoria biaha ta hopi leve. Solamente 1 den cada 5 persona cu a keda infecta cu e virus di Zika ta desaroya sintoma. Ta investigando si Zika por tin conexion, cerca hende muhe na estado, cu trastorno neurologico cerca e feto.

NO TIN REMEDI PA CURA

Te ainda no tin vacuna ni remedi pa trata Zika. E unico manera pa proteha bo mes y bo famia di haya Zika ta door di: Proteha bo curpa door di bisti paña color cla, manga largo, carson largo y pechi. Uza repelente contra sangura; drumi bou muskitero; bolter, haci limpi, tapa of tira afo cualkier obheto cu por retene awa, manera tire di auto, scoter bou pochi mata, cups, tapadera y boter bashi. Haci esaki un bes pa siman; pone screen dilanti bentana y porta pa sangura no drenta.

UNDA PA HAYA INFORMACION

Pa cualkier pregunta of inkietud tocante di e virus di Zika, Departamento di Salud Publico Aruba a instala un liña di telefon temporalmente pa Zika. E number ta: 597-5000 y ta habri 24/7. Sin criadero, no tin sangura, sin sangura no tin Zika, Dengue of Chikungunya!