Polis a cera caya "ilegal" na Noord

ORANJESTAD - Recientemente Cuerpo Policial Aruba, cu yudansa di DOW, a cera un caya "ilegal" di santo cerca di e crusada grandi entre Misa Santa Anna y Warda di Polis. E caya cu a wordo cera no ta un caya legal, pero un "shortcut" cu a forma cu tempo riba un tereno priva cu ta bashi banda di e crusada di Noord.

MAL CUSTUMBER

Automobilistanan ta baha for di e caya asfalta 100 meter for di e crusada unda tin luz di trafico y ta pasa riba e tereno priva pa yega na e otro banda di e crusada. E ta un mal custumber cu ta peligroso y mester stop y consecuentemente Cuerpo Policial a dicidi di cer'e.

USA TERENO PRIVA COMO SHORTCUT

Agente Policial Elvin Zara ta agrega cu, ademas, e doño di e tereno a laga sa tambe di no ta di acuerdo cu su tereno ta wordo uza como "shortcut". Tin un bushalte hopi uza y cuater scol den e area aki, segun Brigadier Franken-Maduro a splica, pues tin hopi trafico den e area y e uzo di e shortcut aki ta causa situacionnan peligroso tanto pa peatonnan como automobilistanan.

SIGUI REGLA DI TRAFICO

Cuerpo Policial ta pidi pa tur automobilista tene cuenta cu e "shortcut" di santo na e crusada cu luz di trafico na Noord ta cera y ta pidi tur automobilista pa sigui reglanan di trafico como cu nan ta un guia pa siguridad di tur hende cu ta participa den trafico. Tin regla pa preveni accidente.