Corsou mas popular cu Aruba segun Business Insider

ORANJESTAD – Mientras cu Aruba ta un di e destinacionnan mas popular den Caribe, e ta ubica ‘te’ na number #11, mientras cu e isla ruman Corsou ta hopi mas dilanti na #4 y St Maarten na #3, riba e lista di 25 islanan mas popular pa Mericano. E prome ta Puerto Rico y e ultimo ta St. Vincent & the Grenadines. E criteria pa e sondeo cu a keda publica riba Business Insiders den fin di siman, ta uno interesante riba su mes. Cuater punto cu ta varia di accesibilidad (desde New York), costo average di un camber di hotel, cantidad di atraccion y e densidad di nos beach(nan). E por wordo interpreta den varios forma dependiente e angulo presenta.

CRITERIA PA ARUBA

Aruba su posicion, aunke ‘te na #11’ ta wordo menciona como ‘un di e destinacionnan mas popular di Caribe’. No obstante esey, Corsou ta gana Aruba de posicion y e criteria ta interesante. Corsou ta mas leu cu Aruba for di New York den distancia (10 minuut mas hopi), y ta mas barata cu Aruba pa loke ta costo pa camber di hotel $171 vs $ 270 respectivamente. Un punto interesante ta cu segun e criteria uza, Corsou tin mas beach cu Aruba unda cu ta midi Corsou na densidad 0.82 compara cu e densidad di Aruba cu ta midi (segun Business Insider) na 0.38. Pues Corsou, tin mas beach. Pa loke ta e actividadnan cu e ta ofrece, Corsou tambe ta ‘gana’ Aruba, unda cu segun e criteria, Corsou tin 3 actividad mas hopi cu Aruba (cu tin 350 actividad vs 353 di Corsou).

INTERPRETACION

Por interpreta e cifranan aki den varios forma. Aruba ta mas caro cu Corsou, cu ta nifica cu Corsou ta mas atractivo cu Aruba den prijs pa hotel. Di otro banda, por interpreta cu mirando cu e prijs ta mas caro cu Corsou, e ta garantisa un turista di nivel mas halto na e prijs ey. Cu Aruba tin menos densidad di beach, ta depende di e forma con Business Insider a haya su informacion. Den e caso aki Business Insider a ‘dividi e largura di cada isla su liña costal, cu e area terestre. “E metrico aki ta premia islanan cu tin un cantidad relativamente grandi di ‘beachfront potencial’ pa nan tamaño. Pues e tamaño di Corsou (mas grandi cu Aruba) a duna e isla ruman un bentaha. Si e ta corecto midi, ta otro cos, hende por argumenta. Como e score indice di e beach, a pone entre 0.0 pa 0.20 pa esun abou, modera pa 0.21 pa 0.50, halto di 0.51 – 0.80, y hopi halto 0.81 y mas halto.

NOS TA RIBA E LISTA

Asina tin mas punto cu tin cu tene na cuenta ora cu interpreta e informacion presenta pa e articulo di Business Insider. Hecho ta cu Aruba y Corsou, (y St Maarten cu ta aun mas halto na # 3) ta figura den e prome 25 islanan den Caribe como destinacion mas desea pa e turista mericano. Por lesa e articulo original aki.