Rector Colegio ta uza mail di trabou pa prepara su boda, siendo AO

ORANJESTAD – Mientras cu su hefe di trabou ta wardando riba rapport di estado di su malesa, e mes ta keto bay preparando su casamento di aki dos luna. Rector di Colegio Arubano Hans Timmermans tin dos luna y mei malo na Hulanda, sin un fecha di bolbe Aruba. Te cu e siman aki ainda, su hefe di trabou (SMOA), a confirma na NoticiaCla.com cu ta ‘en espera di e informe di actualisacion di e docter di trabou.' Y mientras esey ta sosode, Timmermans ta mandando email di invitacion pa tur su invitadonan, te manda email pa hende robes. Y esey tin basta hende indigna. Entre nan minister di enseñansa Michelle Hooyboer Winklaar cu lo ta demandando un splicacion di SMOA. Mas ainda si a uza un mail di trabou, pa cosnan personal. Algo cu SMOA den nan reacion na NoticiaCla.com, ta condena.

PREPARACION DI BODA

NoticiaCla.com tin den su poder, invitacion di casamento di Timmermans, poni pa 23 y 26 di april na London y Den Haag respectivamente. Tin henter un evento planea pa ambos actividad pa cual el a invita tur su amigonan y famia na Hulanda, cu descripcion completo. Den su afan di invita hende, pa ekibocacion a manda e mesun mail pa e lista di coleganan di trabou na Aruba riba nan email. Como tal tur a haya e mail aki, cual a resulta di ta un ekibocacion manera cu su partner mes ta admiti despues den un mail. “Lamentablemente e invitacion pa amigo y famianan pa nos casamento tambe a aparece riba boso email. Esey no tabata e intencion. Despensa.” Asina partner di Timmermans a manda pa e coleganan di trabou di dje.

CUESTIONA SU MALESA?

Riba e mailnan di invitacion ta mira claramente cu e invitacionnan a wordo manda e siman aki (dos dia pasa) mientras cu Timmermans oficialmente ta malo ainda na Hulanda. Riba su mes, su malesa no mester impedi e di por manda mail, ni prepara su boda. Pero esaki sinembargo a crea un situacion na Aruba entre coleganan y tambe otro cu ta cuestiona con un persona cu ta malo, sin cu e por biaha pa Aruba, no tin vacacion, ta sigui prepara su boda normal mientras cu e mester ta na Aruba trahando como rector. E tin dos luna afo caba, sin presenta na trabou, y riba dje su casamento ta hib'e den exterior atrobe fin di otro luna, pa cual e lo mester permanece afo pa un periodo extra. Tur esey den e periodo di examen unda cu un rector lo mester ta na Aruba supuestamente. Pero atrobe, su ausencia mientras cuestiona, a wordo remedia door di pone un otro persona na su lugar temporalmente. Loke ta cuestionabel segun hopi, ta cu e persona aki ta sigui cobra mientras cu tin un incertidumbre riba su situacion.

SALARIO HALTO

A cuestiona e salario halto cu e rector lo ta ganando, unda cu otro medionan ta raporta e suma di 25 mil florin pa luna. NoticiaCla.com a compronde y confirma cu otro rectornan den pasado nunca no a gana un salario asina halto, y cu de hecho e salario ta yega apenas 1/3 parti di e suma menciona. Esey tambe tin ex coleganan poco disgusta y tambe ta cuestiona pakico e persona aki si ta bin gana asina hopi placa, y tambe si ta berdad, di unda Colegio ta saca e placa pa paga e persona aki e suma, ya cu e suma cu gobierno ta subsidia, no ta yega pa esey. NoticiaCla.com no por a comproba e salario halto, pues no por prueba esaki. Loke si por prueba ta cu e salario ‘normal’ di un rector no ta ni cerca di e suma ey.

GOBIERNO FURIOSO

NoticiaCla.com a compronde cu gobierno tambe tin atencion riba e caso aki y cu e mandatario di enseñansa no ta nada contento cu e desaroyo aki, y a demanda di SMOA un splicacion riba e asunto. A compronde cu e mandatario ta cuestiona e forma di proceder aki, unda cu e loke ta pasando, no ta bon pa Colegio y no ta bon pa Aruba. E ta manda e señal robes aparentemente afo pa otronan.

REACCION DI SMOA

Pa loke ta e doño di trabou SMOA (Stichting Middelbaar Onderwijs Aruba), NoticiaCla.com a tuma contacto cu su presidente actual Bart Kool, cu a informa cu enberdad ‘ta wardando riba e rapport di progreso’ di e malesa di e docter di trabou cu ta monitor esaki di Timmermans. “No tin un update ainda” Kool a bisa. Mes momento tabatin rumor cu SMOA lo a kita e rector pa e forma con cos a bay cu su melding di malesa etc. Por corda cu Timmermans no a procedura manera cu mester, y ta despues di un periodo a bin tende cu el a bira malo durante su vacacion na Hulanda na december. A bin e rumor recientemente cu a base di tur e loke a sosode, cu SMOA lo a kita Timmermans for di trabou. A haci e pregunta, pero aki Kool a desmenti esaki. Riba e pregunta cu si Timmermans ta den servicio di SMOA como rector (di Colegio Arubano), Kool a contesta :”Sigur cu si”. Pa loke ta e asunto di casamento, Kool a confirma cu 'e plan di casamento tabata conoci pa nos', indicando cu esey no tabata un sorpresa. Riba e parti di uzo di mail di trabou pa motibonan personal, esey si ta otro asunto. "Colegio no ta hay'e apropia cu email di trabou ta wordo uza pa asuntonan priva" Kool a sigui bisa. "Y manera ta e caso cu cualkier compania, lo actua contra esaki tambe" Kool a sigui bisa, indicando cu lo tuma medida riba esey. Pa loke ta e parti di continiudad di pago mientras cu Timmermans ta malo, Kool a mustra cu 'den cuadro di nos areglo den caso di malesa, SMOA ta sigui paga ora cu e persona ta malo.'