Premier Mike Eman ta tuma un break di trabou

ORANJESTAD – Prome Minister Mike Eman a anuncia diabierna mainta (riba su pagina di facebook) cu e ta tuma un vacacion cortico cu su casa Doina. Normalmente esey no ta noticia pasobra tur minister den e temporada aki ta tuma vacacion mirando cu tin recess. Sinembargo den e caso aki, e anuncio a bin (pa hopi) como sorpresa. Ta considera e temporada aki como uno di impasse, crisis constitucional y como tal no ta e momento pa bay vacacion segun hopi. “Mi kier comparti cu boso cu despues di hopi aña, Doina (su casa) y ami ta tuma un break cortico di nos trabou diario” e mensahe ta cuminsa na bisa riba su pagina di Facebook. Despues e ta sigui gradici tur esnan cu a sostene den e periodo dificil su tras. NoticiaCla a compronde cu ta riba insistencia di docter y su demas coleganan, Eman a dicidi di tuma e conseho serio. NoticiaCla a compronde cu e la bay Merca, unda cu e lo keda un siman pa por relaha su mes y recarga su baterianan. Mesora e comentarionan a cuminsa aparece riba su pagina di Facebook, di su seguidornan deseando Eman tur cos bon.

 Ora cu dos siman pasa Hulanda a impone un KB (Koninklijk Besluit) riba Aruba, hopi a critica e hecho cu a impone algo y despues baha bay cu recess, lagando Aruba den un situacion nunca visto. Un aanwijzing, un presupuesto sin firma y un relacion un tempo super bon, daña te vloer.

E anuncio di e vacacion pa hopi cu a combersa cu NoticiaCla, ta un señal cu a conforma cu e hecho cu no por haci much pa awor, y cu pa awor, no mester spera mas noticia riba e asunto di presupuesto. Manera cu Hulanda a bisa varios biaha, ta ora cu e investigacion ta cla, lo por tin mas noticia. NoticiaCla den curso di dia a raporta caba cu tin un silencio hermetico rond di e asunto aki. Y cu e bishita di un di e ambtenaarnan mas importante di gabinete, Richard van Zwol, lo a spera un tipo di informacion. Pero e hecho cu e bishita aki a bin y bay sin ningun tipo di informacion na publico, tabata otro señal pa hopi, cu cos no ta bon y cu mas bien tin cu warda trankil te ora cu e tempo yega cu e investigacion termina. Mientrastanto premier Eman ta cu vacacion, y e otro Mike (de Meza ) a tuma e timon pa un siman como prome minister interino.