Progreso medico di baby Lunah ta continua poco poco na Cali

CALI – Diestres siman despues cu el a nace, e baby cu a captiva un isla completo cu su fervor pa biba conoci solamente como ‘baby Lunah’, ta sigui bringa pa su bida. Ya ta dos siman cu baby Lunah ta den man di specialistanan Colombiano, y for di e informacion di su famia por deduci cu e ta bayendo bon. Tabata un siman pasa cu el a opera y awe e famia ta raporta cu cosnan bon ta pasando. Te cu ayera, su stoma ta funciona bon despues di e operacion, segun su mama Liandha. “E ta recuperando poco poco, pero sigur. Su tripa y stoma ta doing great!” e mama a sigui bisa.

E CAMINDA DI LUNAH

Tabata dos siman caba cu tabatin henter un desaroyo rond di e baby aki, pa cu su baymento pa Colombia cu finalmente a logra. Mientrastanto ya ta 13 siman cu baby Lunah ta na bida, 12 siman desde cu nan a detecta e problema na curason, 9 siman desde cu e mayornan por a hiba e baby cas, y 2 siman desde cu nan a bay Colombia. “Y hopi mas siman pa wak bo. Lunah ta bayendo hopi bon!”, e mama a finalisa bisando.

SPERANSA PA LUNAH

For di momento cu e noticia a plama algun siman pasa y cu un pesadia personal a bira publico ora cu e famia a comparti nan caminda di cruz, Aruba a brasa e baby y a cuminsa comparti mensahe di sosten y resamento manera cu hopi tempo no a conoce. Mientras cu e ta un bataya cu ta contra tur pronostico, baby Lunah hunto cu su mayornan ta desafiando tur esaki y ta mustra cu e baby tin tur intencion di mustra tur hende cu e ta bringa e retonan cu un forsa insuperabel. E potret ta exclusivo pa NoticiaCla.com, danki na famia di baby Lunah.