'Doubledecker' di Arutram a yega remise na Playa

ORANJESTAD – E siman aki e di tres streetcar of tram, cu lo bay wordo opera door di AruTram, bou di Arubus, a yega su sede na Playa. E tram cora ta e di dos double-decker y ta bay forma parti di un trio di vehiculonan cu ta bay percura pa un fluho constante di bishitantenan por bishita centro di ciudad di Oranjestad.

TRANSPORTE PA REMISE

Despues cu el a yega Aruba na inicio di e siman aki, el a wordo transporta diahuebs den oranan di atardi pa Oranjestad, unda e ta keda den e 'remise' pa asina prepar'e pa drenta den funcion y wordo inspecciona pa segura cu tur cos ta na ordo.

FLOTA EXPANDI

E tram aki ta forma parti di un flota di tres cu ta cay bou maneho di Arubus y cual a wordo incorpora den e plan di Gabinete Mike Eman I y II pa revilitasa centro di Oranjestad. E tram cu a yega awo, mescos cu e otronan, ta realisa biahenan for di dilanti di waf di Oranjestad te final di Caya Grandi, dilanti di Plaza Nicky Habibe. E intencion ta cu ta hiba clientenan, particularmente turistanan di barconan crucero pa e parti mas pariba di e centro pa asina nan por bishita e pacusnan.

DETAYE DI E TRAM

E tram cu a yega Aruba awor ta di color cora y tin escudo di Aruba graba na e parti na banda. E proyecto di tram ta conta cu cuater streetcar, di cual un ta fungi como reserva. E vehiculo nobo ta yega pa alivia e demanda y baha e cantidad di tempo cu usuarionan ta warda entre un tram y e otro. E streetcar aki ta forma parti di e plan manera a keda presenta originalmente, esey kiermen cu e no ta un compra adicional, ni tampoco ta representa gastonan extra pa caha di Gobierno di Aruba.