Grabacion di himno a impacta nos musiconan na New York

MANHATTAN – E grabacion di nos himno nacional y e cancion “music is our language” di Hildward Croes ta halando hopi atencion, specialmente den mundo di musica. De hecho e propio musiconan versa Arubano mes a keda hopi impresiona di e loke nan ta experienciando na New York e dos dianan aki. Mientras cu e productor Jonathan Vieira mes no por a bisa mucho na NoticiaCla.com debi na su envolvimento, via Jan Poets cu ta raportando esaki, e informacion ta yegando afo. Segun Poets, e presentacion di e dos cancionnan menciona, a sorprende y a laga hopi lagrima cerca tur hende na momento cu e orquesta Sinfonico di New York a presente cu nos artistanan Arubano.

EMOCION HALTO

“No ta solamente e himno nacional “Aruba dushi tera” ta ser graba den studio aki na Manhattan, NY, pero tambe e cancion inmortal di Hildward Croes “Music is our language”, cual Jonathan Vieira a dedica na nos inolvidable musico Hildward Croes (q.e.p.d), cu a ser graba pa nos musiconan acompaña pa e orchestra Sinfonica di New York. E cancion a ser graba den forma orchestral y emocionnan tabata asina grandi cu a laga tur esnan presente cu lagrima na wowo. Hilyann Croes kende ta yiu di Hildward Croes, y cu a biaha for di Tampa y a yega New York den oranan di marduga, tambe no por a contene su emocion . Y riba potret por mira Teddy Phillips ta console. Keda pendiente pa mas for di Manhattan, NY, cu e cobertura historico aki” Poets a termina bisando.

Foto cortesia Jan Poets/Poets Show