Diadomingo proximo premio Oscar lo pasa riba ABC canalnan 14 y 314 HD

ORANJESTAD - Tur aña fanaticonan di pelicula ta warda riba e dia special aki pa por wak cua pelicula, serie, actor, actrice, producer y otronan den e mundo di pelicula ta bay cu e premio Oscar. Ta un anochi yena cu ambiente, un programa creativo pa entreten’e tur cu ta sigui e show. Diadomingo awor dia 28 di februari 2016 lo ta e di 88 biaha di premionan Oscars y lo tuma lugar na Dolby Theatre® na Hollywood & Highland Center® na Los Angeles, California. Clientenan di SETAR Cable Services por sigui e evento na ABC riba canal 14 y den High Definition riba canal 314. E programa ta cuminsa ya caba for di 7 or y mey di anochi riba e “red carpet”, sigui pa e inicio di e ceremonia pa 8 or di anochi. Y e evento mes cu lo cuminsa pa 9 or y mey. E aña aki, manera tur aña lo ta uno excitante un biaha mas, ya cu tin hopi actornan cu a keda nomina cu nan fanaticonan lo kier mira nan faborito gana, entre nan, Leonardo DiCaprio, cu nunca a yega di hiba un Oscars cas. SETAR conhuntamente cu ABC ta regalando un “Dinner & a Movie” cu un concurso via SETAR su Facebook page pa tur cu kier participa door di contesta e preguntanan tocante e premio Oscar. SETAR ta anuncia e ganador diasabra atardi dia 27 di februari 2016. Suerte na tur cu ta desea di participa y no lubida di sintonisa e evento di premionan Oscar diadomingo awor na ABC.