Dowers: Oportunidadnan pa rehabilita y resocialisa presonan na KIA

ORANJESTAD - Den tur e añanan di existencia di KIA, e palabranan Korrektie Instituut Aruba (Centro di Coreccion Aruba) no a haya contenido real. Actualmente e proceso ta andando pa pone un structura nobo riba papel, pa cual e documento mester keda cla pa fin di maart 2016. Participando na e proceso aki ta DRH (Departamento di Recurso Humano di gobierno), e gerencia di KIA y representantenan di Ministerio di Husticia.

REUNION RECIEN

Recientemente a tuma luga un reunion na cual minister di husticia Arthur Dowers tambe a participa. El a splica cu pa añanan largo a purba di traha cu e structura di organisacion existente, pero como cu esaki no a duna e resultadonan desea, a opta pa traha un concepto nobo.

STRUCTURA NOBO

Yega na un structura nobo a tuma su tempo. E proceso a encera e evaluacion y reevaluacion di tur funcion den KIA, y ta inclui, basa riba e structura nobo, e reclutamento di personal nobo pa duna contenido na e trabao cu tin cu tuma luga.

PRIVA DI LIBERTAD

Dowers a bisa cu un di e factornan principal cu mester tene cuenta cu ne ta cu e personanan cu ta cera den KIA ta personanan cu ta wordo depriva di nan libertad, y mester ofrece nan un programa di rehabilitacion y resocialisacion, esta "Korrektie". Esey tabata e enfoke dia a traha e prizon, pero nunca a logra duna contenido na e nomber di e institucion, Minister Dowers ta agrega. E mandatario a expresa cu tur e instancianan envolvi ta spera cu e structura di organisacion nobo si lo provee e oportunidadnan y un situacion real unda cu e persona ta ricibi guia y e instrumentonan pa por yega na cambionan y mehoracionnan real den su bida. 

LO PRESENTA DOCUMENTO FIN DI MAART

Despues cu e documento menciona keda cla na fin di maart, lo present'e na e sindicatonan na cual empleadonan di KIA ta afilia y lo sigui cu e fasenan legal cu mester tuma luga pa formalisa e contenido di e documento. E titular di husticia a splica cu ta pensando riba con pa logra tin personanan capacita disponibel pa ora cu mester yena cuponan di trabou cu ta bin liber den KIA, y ta discutiendo riba e opcionnan.